Genti për Unitetin: Kemi ndarë gjithçka bashkë e edhe besimin se do t’ia dilnim dhe ia dolëm!

Në kazermën e Forcës së Sigurisë së Kosovës (FSK), në Gjilan u organizua ceremonia solemne ushtarake për daljen në pension të Rreshter Afrim Nuhiut, e bashkëluftëtari i tij në luftën e Ushtrisë Çlirimtare të Kosovës (UÇK), Bujar Nevzati – Genti tha se sot kur Afrim Nuhiu – Uniteti po e përmbyllë edhe shërbimin si epror i FSK-së i paepur edhe në kohë paqeje, ndjehet krenar që ka pasur një shok si Afrimi, burra të tillë që e nderojnë familjen, shoqërinë dhe atdheun.

“Me ty kam ndarë ditët më të rëndësishme të jetës sime, ditët e luftës për lirinë e atdheut. Nga dita e parë e deri në përfundim të luftës, ishim bashkë, krah për krah. Së bashku kemi ndarë të mirën e të keqen, bukën, rrezikun, dhimbjen, por edhe krenarinë e asaj kohe të shenjtë. E kemi ndarë frikën, por edhe besimin se do t’ia dilnim dhe ia dolëm”, ka thënë Nevzati, transmeton Portali 2LONLINE.com.

Nevzati theksoi tutje se sot, kur Afrim Nuhiu po e përmbyll edhe shërbimin e tij si epror i FSK-së i paepur edhe në kohë paqeje,  ndihet krenar që ka pasur një shok si Afrimi, sepse burra si ai nderojnë familjen, shoqërinë dhe atdheun.

“Të uroj shëndet e gëzim në vitet në vijim. Pushimi yt le të jetë i mbushur me dinjitet, siç e ke mbajtur gjithmonë uniformën dhe fjalën burrërore”, ka thënë Bujar Nevzati-Genti.  /2LONLINE/