Gati për fillim të vitit të ri akademik

(2L ONLINE) – Takimi mes drejtueseve të Universitetit Publik “Kadri Zeka” në Gjilan dhe Ministrit të Arsimit Shkencës dhe Teknologjisë, Ramë Buja, është zhvilluar, me rastin e përgatitjeve për fillimin e vitit të ri akademik.

Ministri Buja, me këtë rast, shprehu interesimin e tij lidhur me procesin e përgatitjeve për fillim vitin e ri dhe ecurinë e konkursit për plotësimin e stafit akademik, ndërkaq falënderoi drejtuesit e Universitetit ‘Kadri Zeka” për punën që kanë bërë dhe po e bëjnë në drejtim të ngritjes se këtij universiteti, si në zgjerimin e hapësirave për studentë dhe mësimdhënës, po ashtu edhe në cilësi.

U.d. rektori i universitetit “Kadri Zeka”, Arben Dërmaku e njoftoi ministrin për gjendjen në këtë universitet, ai tha se janë bërë të gjitha përgatitjet për pranimin e studentëve të rinj në afatin e dytë, ndërsa foli edhe për fazën e pranimit të stafit të rregullt akademik. Ndërkohë që rektori Dërmaku ia ka dorëzuar ministrit Buja raportin e punës së Universitetit “Kadri Zeka”, që nga themelimi i tij e deri më sot.

Ndërkohë, Ministri Buja theksoi se synimi i përbashkët është cilësia, ndërsa tha se MAShT është e gatshme çdoherë për të kaluar së bashku sfidat në këto institucione të arsimit të lartë. /2L ONLINE/