Gagica: Rreth 300 punëtorë të “Tregut” në Gjilan, ende pa paga!
“Sot, më 14 gusht, rreth 300 punëtorë të “Tregut” në Gjilan ende nuk kanë marrë pagat e tyre, dhe kjo vonesë është e turpshme dhe e papranueshme”, ka thënë kreu i AAK-së së Gjilanit, Nazim Gagica.
Ai shtoi se institucionet komunale dhe përgjegjësit kompetent duhet menjëherë të marrin masa që punëtorët të marrin shpërblimin e merituar për punën e tyre.
Gagica thotë se mosrespektimi i afateve të pagesës jo vetëm që shkel të drejtat e punëtorëve, por dëmton edhe besimin në administratë e menaxhment.
“Jemi të vendosur të mbrojmë zërin e çdo punëtori dhe t’i kërkojmë llogari çdo institucioni që dështon në detyrën e tij. Paga e punëtorit nuk duhet të jetë asnjëherë peng i neglizhencës apo mosmenaxhimit”, thotë Nazim Gagica i AAK-së. /2LONLINE/