Gagica i reagon kreut të komunës: Ka mjaftua me bë “upgrade” sistemin ekzistues dhe kishit kursye 480 mijë €
Ditë më parë, Alban Hyseni, kryetar i Komunës së Gjilanit së bashku me Zëvendësministrin e Ekonomisë, Getoar Mjeku, nënshkruan Memorandumin e bashkëfinancimit për projektin “Gjilani Smart City (Neutral Host)”, me vlerë 500 mijë euro.
Ndaj kësaj ka reaguar, Nazim Gagica. kryetari i Aleancës për Ardhmërinë e Kosovës (AAK), dega në Gjilan, i cili ka rikthyer në kujtesë kohën kur ishte drejtor i Administratës Komunale (viti 2017), dhe kur kjo punë ishte kryer. Andaj, ka thënë ai, ka mjaftuar që kryetari i komunës me e bë “upgrade” sistemin ekzistues dhe do të kishte kursyer 480 mijë €, transmeton 2LONLINE.com.
“Moti janë bërë këto punë që juve sot ju duken risi apo inovacion. “Gjilani Smart City”, versioni 2017: punë origjinale. Versioni 2025: e njëjta punë, por me pak grim dhe 500 mijë € faturë”, ka thënë në reagimin e tij, Nazim Gagica i AAK-së.
Ai po ashtu theksoi se ky pushtet një gjë duhet ta ketë të qartë se Gjilani nuk zhvillohet me grim elektoral e marketing, e as me foto të ditës e të natës, por se Gjilani zhvillohet me projekte reale, ide dhe punë konkrete, jo pra me make-up politik.
Përndryshe, në zgjedhjet e 12 tetorit, Nazim Gagica synon postin e të parit të komunës duke qenë kandidat i AAK-së për kryetar komune. /2LONLINE/