Gagica: E-kioska projekti ynë, Prishtina një kopje e zbehtë!

/2L ONLINE/ – Drejtorit të Drejtorisë së Administratës së Përgjithshme në Gjilan, Nazmi Gagicës, duket se i ka mbetur hatri që Komuna e Prishtinës nisi e para projektin e-kioska, duke thënë se ky projekt ishte projekt ideor i Komunës s Gjilanit, por që e para ka filluar ta realizojë Prishtina, pasi në këtë drejtim, në raport me Gjilanin është bërë prolongimi i realizimit të tij, nga Agjensioni i Regjistrimit Civil dhe agjensione që kanë lidhje me Gjendjen Civile.

Megjithatë Gagica, thotë se ajo e Prishtinës mbetet një kopje e zbehtë sepse derisa komuna e Prishtinës ofron vetëm një dokument dhe atë vetëm për përdorim të brendshëm, Gjilani përmes e-kioskave do të ofrojë tri produkte.

“Si drejtori kemi bërë kërkesën për qasje në bazën e të dhënave në Agjensionin e Regjistrimit Civil, të cilët që nga fundi i vitit të kaluar nuk kanë kthyer përgjigje. Ne kemi projektin e gatshëm për dokumentet e Gjendjes Civile dhe japim tri produkte për qytetarët për dallim prej Komunës së Prishtinës e cila ofron vetëm një dokument dhe atë vetëm për përdorim të brendshëm”, tha drejtori Gagica, duke kërkuar që të bëhet lejimi i qasjes në këto të dhëna, në mënyrë që shërbimet e Komunës së Gjilanit të ofrohen edhe më afër qytetarëve të Gjilanit dhe më gjerë. /2L ONLINE/