Gagica: Aleanca asnjëherë nuk ka qenë pengesë për tema me interes për qytetarët, nuk do të jetë as tani e në të ardhmen

Kryetari i Aleancës për Ardhmërinë e Kosovës (AAK), dega në Gjilan, Nazim Gagica bashkë me kryetaren e Gruas së Aleancës, Zarife Asllani, kanë pritur në takim kryetarin e Kuvendit të Komunës, Kushtrim Kadriu.

Është biseduar për tema me interes për qytetarët tanë; arsimin, shëndetësinë, kulturën e sportin, infrastrukturën rrugore si dhe me theks të veçantë punën e Kuvendit.

I pari i AAK-së, Nazim Gagica i AAK-së ka kërkuar nga i pari i Kuvendit Komunal, Kushtrim Kadriu, që të gjejë rrugëdalje në mënyrë që të mbyllet tema e buxhetit komunal si nevojë për qytetarët e Gjilanit.

Po ashtu, Gagica ka kërkuar respektim të rekomandimeve të Qeverisë përkatësisht MAPL-së lidhur me buxhetin e propozuar si dhe harmonizimin e qëndrimeve mes ekzekutivit dhe legjislativit.

”Aleanca asnjëherë nuk ka qenë pengesë për tema me interes për qytetarët, nuk do të jetë as tani e në të ardhmen. Aleanca vazhdon të mbetet gardiane e pakompromisë e interesit qytetar”, ka thënë Nazim Gagica, kryetar i AAK-së së Gjilanit.  /2LONLINE/