Fushatë vetëdijësuese në Gjilan për mbrojtjen e fëmijëve nga rreziqet online

Në Gjilan ka nisur një seri aktivitetesh vetëdijësuese që synojnë rritjen e sigurisë së fëmijëve në hapësirën digjitale. Në kuadër të projektit “Mbrojtja e fëmijëve nga rreziqet e lojërave online”, Njësia Sektor dhe Komunitet e Stacionit Policor në Gjilan, në bashkëpunim me përfaqësues të Qendra për Punë Sociale, përkatësisht zyrtaren e kësaj Qendre, Amire Hoxha, po organizojnë ligjërata me temën “Siguria në Internet”.

Këto aktivitete kanë për qëllim të rrisin ndërgjegjësimin e fëmijëve dhe të rinjve mbi rreziqet që lidhen me përdorimin e pakontrolluar të internetit, duke përfshirë bullizimin digjital, mashtrimet online dhe format e ndryshme të abuzimit në rrjet.

Zyrtarët e përfshirë në këtë nismë theksojnë rëndësinë e edukimit të hershëm për të parandaluar pasojat që mund të vijnë nga ekspozimi i pakujdesshëm në platformat digjitale.

Gjatë ligjëratave, nxënësit njihen me mënyrat konkrete të mbrojtjes së të dhënave personale dhe përdorimit të sigurt të internetit, si dhe me procedurat e raportimit në rastet e keqpërdorimeve tek organet kompetente.

Aktivitetet janë zhvilluar në disa shkolla të komunës së Gjilanit, ku pjesëmarrës kanë qenë nxënësit e klasave VI–IX. Ligjëratat janë realizuar në formë interaktive, duke nxitur diskutim të hapur dhe pjesëmarrje aktive nga nxënësit përmes pyetjeve dhe shembujve praktikë.

Në përmbyllje të secilit takim, nxënësve u janë shpërndarë fletushka informuese me këshilla dhe udhëzime konkrete për të rritur sigurinë e tyre në internet, duke forcuar kështu rolin e edukimit si mjet kyç në mbrojtjen e fëmijëve nga rreziqet online.  /2LONLINE/