Fushatë vetëdijesimi për gjilanas rreth të drejtave të tyre mbi privatësinë

/2L ONLINE/ – Në kuadër të lancimit të fushatës njëjavore, e cila do të zhvillohet në gjashtë komunat më të mëdha të vendit, Agjencia Shtetërore për Mbrojtjen e të Dhënave Personale sot hapi fushatën informuese/vetëdijesuese me qytetarët e Gjilanit.

Personeli i Agjencisë, duke ngritur dy stenda në hapësirën te Teatri i Qytetit  si hapësirë e frekuentuar, që në orët e para të mëngjesit kishte filluar komunikimin e drejtpërdrejtë me qytetarë duke u shpërndarë materiale promovuese (fletëpalosje, broshura, kapela, flamuj etj.).

Qëllimi i kësaj fushate është vetëdijesimi i qytetarëve rreth të drejtave të tyre (si subjekte të të dhënave personale) mbi privatësinë. Zyrtarët e Agjencisë Shtetërore për Mbrojtjen e të Dhënave Personale, përmes kësaj fushate simbolike, e dhanë edhe një provë shtesë se autoriteti i vetëm i mandatuar për të mbrojtur privatësinë e qytetarëve është i përkushtuar që t’i trajtojë të gjitha ankesat e tyre, duke e shtrirë ndikimin e saj te përpunuesit e të dhënave personale, që këto të fundit t’i përpunojë në mënyrë të ligjshme, të paanshme, duke mos e cenuar privatësinë e askujt.

Duke komunikuar me kalimtarët e rastit, zyrtarët e Agjencisë inkurajuan ata që t’i drejtohen Agjencisë për çdo shqetësim që ata mund ta kenë për sa i përket keqpërdorimit të mundshëm të të dhënave të tyre personale.

Qytetarët, mes tjerash u njoftuan rreth fushëveprimit të Agjencisë, vendndodhjes së saj (zyrave në Prishtinë) dhe atyre sugjerua që të klikojnë sa më shpesh në web faqen zyrtare të këtij autoriteti www.amdp-rks.org si dhe adresën e tij në Facebook www.facebook.com/ASHMDHP
për t’u njoftuar rreth më te rejave të fundit në këtë fushë, si dhe për të paraqitur ankesat e tyre në formularin elektronik.

Vlenë të theksohet se kjo fushatë u realizua në partneritet me Kompaninë ‘DOCMAN’, e cila është pjesë e Grupit REISSWOLF.