“Fuqia e Bashkimit Rinor”, organizata më aktive – kryetari i saj, Dardan Marovca nderohet me çmimin “Vullnetari i Vitit”

Organizata rinore “Fuqia e Bashkimit Rinor”, e njohur si një ndër forcat më të rëndësishme të aktivizimit qytetar në Gjilan, është shpallur për të dytin vit me radhë si Organizata më Aktive. Ky vlerësim i rëndësishëm është pasqyrim i punës së pandalshme, energjisë rinore dhe projekteve të shumta që organizata ka realizuar gjatë vitit në shërbim të komunitetit.

Kryetari i organizatës, Dardan Marovca – Daja, është nderuar gjithashtu me çmimin “Vullnetari i Vitit”, duke u vlerësuar për angazhimin e tij të palodhshëm, lidershipin inspirues dhe kontributin e vazhdueshëm në ngritjen e vlerave rinore në qytet. Roli i tij si një model i angazhimit aktiv e ka bërë atë shembull për shumë të rinj që sot zgjedhin të përfshihen në jetën shoqërore.

Dardan Marovca ka bërë me dije se gjatë viteve të fundit, “Fuqia e Bashkimit Rinor” ka zhvilluar dhjetëra aktivitete edukative, kulturore dhe humanitare, duke dëshmuar se rinia e Gjilanit është forcë transformuese dhe e gatshme të marrë përgjegjësi për të ardhmen e qytetit.

Sipas tij, pikërisht kjo energji është kthyer në moto të organizatës: “Fuqishme hiç ndryshe” – një thirrje motivuese që përmbledh shpirtin e punës vullnetare dhe unitetin e të rinjve.

Marovca ka shtuar se ky vlerësim i dyfishtë është një mesazh i qartë për gjithë rininë. Aktivizimi krijon ndryshim, bashkimi sjell rezultate dhe vullneti i mirë ndërton të ardhmen.

““Fuqia e Bashkimit Rinor” mbetet e përkushtuar të vazhdojë me projekte inovative, duke krijuar hapësira më të mëdha për pjesëmarrjen e të rinjve dhe duke forcuar rolin e tyre në jetën publike. Ky sukses është dëshmi se kur të rinjtë veprojnë së bashku, çdo objektiv është i arritshëm – fuqishëm, me vizion dhe pa u ndalur”, ka thënë Dardan Marovca, kryetar i i organizatës “Fuqia e Bashkimit Rinor”.  /2LONLINE/