Ftohen bujqit në protestë

Kryesia e Federatës Sindikale të Bujqve të Kosovë (FSBK) fton të gjithë bujqit e Kosovës që të dalin në protestën e datës 17 shkurt 2016, në ora 14:00, kundër Qeverisë së Kosovës që sipas tyre ka nënshkruar marrëveshje shumë të dëmshme me Serbinë dhe Malin e Zi.

Në një njoftim për media të kësaj sindikate, thuhet se nga këto marrëveshje dëmtohen rëndë Republika e Kosovës, e sidomos bujqit, sepse humbasim mijëra hektarë tokë me Malin e Zi.

“Nëse instalohet “Zajednica” humbasim dhjetëra mijëra hektarë tokë bujqësore, livadhe, kullosa, pyje, e të ngjashme. Liqeni i Ujmanit, që shfrytëzohet shumë edhe për ujitje, nuk do të menaxhohej më nga Kosova, por nga “Zajednica””, thuhet në njoftimin e Sindikatës.

“Këta qeveritarë, tash e sa vite, kanë shkelur bujqit dhe qytetarët tjerë të Kosovës. Këta janë të papërmirësueshëm, andaj duhet të largohen nga pushteti. Nuk krijuan kushte për zhvillimin e bujqësisë, dhe nuk i siguruan treg prodhimit vendor. Me këta në pushtet, nuk kemi mirëqenie as tash, e nuk do të ketë mirëqenie as për brezat e ardhshëm”, thuhet tutje në këtë njoftim.