FSK në bashkëpunim me NALT organizojnë punëtorinë e nënoficerëve

Forca e Sigurisë së Kosovës, në bashkëpunim me NATO Advisory and Liaison Team (NALT), po realizon punëtorinë e radhës me nënoficerët e lartë të FSK-së.

Me këtë rast, Komandanti i Forcës së Sigurisë së Kosovës, Gjenerallejtënant Bashkim Jashari, i priti në takim nënoficerët pjesëmarrës, të cilët i falënderoi për punën, angazhimin, përkushtimin dhe profesionalizmin e treguar në përmbushjen e detyrave të tyre.

Gjatë takimit, Komandanti i FSK-së theksoi mbështetjen e vazhdueshme për zhvillimin dhe forcimin e korit të nënoficerëve të FSK-së, duke vlerësuar rolin e tyre të rëndësishëm në ngritjen profesionale të personelit dhe avancimin e mëtejshëm të Forcës.

Në këtë kuadër, u theksua roli i pazëvendësueshëm i korit të nënoficerëve në sukseset e FSK-së, veçanërisht në përgatitjen, trajnimin, mentorimin dhe këshillimin e vazhdueshëm të personelit. Me këtë rast, KOMFSK kërkoi nga nënoficerët e lartë që të vazhdojnë me përkushtim dhe angazhim në ngritjen e standardeve profesionale në të gjitha nivelet e Forcës.

Punëtoria ka në fokus forcimin e bashkëpunimit ndërmjet korit të oficerëve dhe atij të nënoficerëve, mbështetjen dhe avancimin e kanalit të nënoficerëve, si dhe konsolidimin e rolit të korit të nënoficerëve si një nga shtyllat kryesore në ndërtimin, zhvillimin dhe ngritjen e mëtejshme profesionale të FSK-së. /2LONLINE/