FSK-ja trajnon personelin e GIZ-it

Në Qendrën Ndërkombëtare Trajnuese për Kërkim Shpëtim (QNTKSh) është zhvilluar me sukses Trajnimi i Ndihmës së Parë për pjesëtarë të personelit ndërkombëtar dhe lokal të “Deutsche Gesellschaft für Internationale Zusammenarbeit” GIZ, duke përfshirë pjesëmarrës nga Kosova dhe Maqedonia e Veriut.

Ky trajnim intensiv kishte në fokus teknikat e shpëtimit të jetës, reagimin emergjent dhe aftësitë praktike të ndihmës së parë, duke synuar rritjen e gatishmërisë së pjesëmarrësve për përballimin e situatave kritike. Gjatë pesë ditëve të trajnimit, pjesëmarrësit patën mundësinë të ushtrojnë teknika të ndryshme të shpëtimit dhe ndihmës së parë në skenarë realistë, duke forcuar aftësitë e tyre profesionale.

Bashkëpunimi me GIZ në organizimin dhe zhvillimin e këtij trajnimi thekson angazhimin tonë të përbashkët për siguri, qëndrueshmëri dhe ndërtimin e kapaciteteve në rajon. /2LONLINE/