FSK-ja aktivitet bamirësie për fëmijët në kushte të vështira ekonomike

Forca e Sigurisë së Kosovës (FSK) edhe përmes aktiviteteve sociale vazhdon bashkëpunimin me komunitetin, me institucionet dhe kompanitë vendore dhe organizatat që veprojnë në Kosovë. Një ekip i oficerëve të rinj të Qendrës për Studime Universitare, me mbështetjen e plotë të Komandantit të FSK-së, Gjenerallejtënant Rrahman Ramës kanë organizuar një garë-vrapimi bamirësie “Vrapo me FSK-në” në komunën e Gjakovës. Në këtë garë 10 kilometra të gjatë do të marrin pjesë pjesëtarë të FSK-së, KFOR-it, përfaqësues të organizatave civile, të institucioneve vendore dhe ndërkombëtare dhe do të mbahet me datën 4 tetor 2015.

Kryetarja e komunës së Gjakovës, znj. Mimoza Kusari-Lila ka mirëpritur përzgjedhjen e FSK-së, pikërisht qytetin e saj, për organizimin e vrapimit humanitar dhe ka mbështetur ekipin e oficerëve të rinj për iniciativën e tyre.

Qëllimi i këtij vrapimi humanitar është rritja e bashkëpunimit të FSK-së me komunitetin. Pasi që fëmijët janë e ardhmja jonë, FSK-ja ka vendosur që përmes këtij aktiviteti të krijojë një Fond për fëmijët në nevojë që jetojnë në kushte të rënda ekonomike.

Gjithashtu, mbajtja e këtij evenimenti është edhe promovimi i llojllojshmërisë kulturore, etnike dhe fetare të Komunës së Gjakovës dhe ngritja e vetëdijes së qytetarëve për rëndësinë e aktiviteteve të tilla sportive.

Duke ditur që aktivitete të tilla sociale organizohen nga të gjitha ushtritë e vendeve të zhvilluara, këtë eveniment e konsiderojmë si një hap drejt ngritjes së kapaciteteve të FSK-së, në fushën e bashkëpunimit civilo-ushtarak.

Deri më tani; FSK-ja, KFOR-i, institucione vendore dhe ndërkombëtare si dhe qytetarët e shumtë kanë paralajmëruar pjesëmarrjen në këtë eveniment. Prandaj FSK-ja inkurajon qytetarët që të vazhdojnë me regjistrim, në mënyrë që të jenë kontribuues të qëllimeve tona të përbashkëta.

Regjistrimi tashmë ka filluar në dy pika:
Në Gjakovë, përballë hotel Pashtrikut, vazhdon deri më, 03. 10. 2015, nga ora 10:00-17:00. Regjistrimi në këtë pikë do të vazhdojë edhe në ditën e vrapimit, më 04.10.2015, deri në ora; 09:45, dhe,
Prishtinë deri më datën: 03. 10. 2015, nga ora 10:00–17:00, pranë Teatrit Kombëtar.

Informacionet më të hollësishme mund të gjeni edhe në ueb faqen në Facebook; Vrapo me FSK–Run with KSF.