FSK forcon bashkëpunimin me Gardën Nacionale të Ajovës, Strasser dekorohet me medaljen “Shërbim Vetëmohues”

Komandanti i Forca e Sigurisë së Kosovës (FSK), Bashkim Jashari, ka pritur në një takim zyrtar Rreshter Majorin Komandues të Gardës Nacionale të Ajovës (IANG), Matthew T. Strasser, ku u diskutua për thellimin e bashkëpunimit ushtarak ndërmjet dy institucioneve.

Gjatë takimit, të dyja palët vlerësuan bashkëpunimin e deritanishëm si shumë të suksesshëm, me fokus të veçantë në zhvillimin dhe avancimin e trupës së nënoficerëve. Gjenerallejtënant Jashari theksoi rëndësinë e kontributit të partnerëve amerikanë, në veçanti të Garda Nacionale e Ajovës, në ndërtimin e një strukture profesionale dhe të qëndrueshme të nënoficerëve brenda FSK-së.

Nga ana e tij, Rreshter Majori i Komandës Strasser vlerësoi lidershipin e Gjeneral Jasharit dhe angazhimin e tij në zhvillimin e karrierës ushtarake për personelin e FSK-së. Ai theksoi rolin kyç të nënoficerëve si shtylla kryesore e forcës, duke nënvizuar përkushtimin e vazhdueshëm për fuqizimin e këtij segmenti.

Në përmbyllje të takimit, komandanti i FSK-së dekoroi Rreshter Majorin Strasser me medaljen “Shërbim Vetëmohues”, në shenjë mirënjohjeje për mbështetjen e tij të vazhdueshme ndaj zhvillimit dhe profesionalizimit të FSK-së. /2LONLINE/