FSHF: I duam të gjithë tifozët

Reagon Federata shqiptare e futbollit në lidhje me raportimet e pavërteta në lidhje me prezencën e tifozëve kosovar në ndeshjen, Shqipëri – Serbi.

Federata Shqiptare e Futbollit, kërkon të informojë opinionin publik në lidhje me lajmet e fundit që qarkullojnë në media, për “këshillimin” apo “sygjerimin” nga ana e UEFA-s, për të mospajisje me bileta të tifozëve nga Kosova, për ndeshjen Shqipëri – Serbi, që do të zhvillohet më 8 tetor 2015, në Elbasan:

Nuk ka patur rekomandime apo sygjerime të tilla, për Federatën Shqiptare të Futbollit, nga ana e organizmit më të lartë të futbollit europian, UEFA, transmeton sportishqiptar.

Nga ana e saj, FSHF garanton që edhe sikur të kishte të tilla “këshilla”, ato kurrsesi nuk do të merreshin parasysh nga ana e institucionit shqiptar të futbollit. Tifozët kosovarë, kanë qenë, janë dhe do të jenë, kurdoherë të mirëpritur, në të gjitha ndeshjet e kombëtares kuqezi, pavarësisht se kundër cilës kombëtare do të luajmë.

Mbështetja e tyre dhe e të gjithë shqiptarëve kudo në botë, për ekipin kombëtar të futbollit, është e pazëvendësueshme dhe burim frymëzimi për djemtë tanë në arritjen e rezultateve pozitive që i dëshirojmë të gjithë.

Edhe njëherë i bëjmë thirrje, të gjithë grupimeve të tifozerisë së kombëtares, që të mbështesin sa më fort, si deri më tani, ekipin kombëtar të futbollit.

KOMENTE