Forcat e Armatosura mund të jenë pjesë e dialogut
Njohësit e çështjeve të sigurisë kanë paralajmëruar se Lista Serbe do të paraqesë pengesë për formimin e Forcave të Armatosura të Kosovës (FAK). Naim Maloku dhe Ramadan Qehaja kanë vlerësuar për “Epokën e re” se lidershipi vendor ka gabuar që transformimin e Forcës së Sigurisë së Kosovës (FSK) në Forca të Armatosura nuk e ka bërë në legjislaturën e kaluar.
Sipas tyre, në këtë mandat e ardhmja e Forcave të Armatosura nuk është vetëm në duart e Kuvendit.
“E ardhmja e Forcave të Armatosura tani mbetet në dialogun Kosovë – Serbi dhe në procesin e anëtarësimit të Serbisë në NATO, nëse ajo vendos për atë rrugë dhe kushtëzimit që tani duhet Shqipëria t’ia bëjë Serbisë për votën pro të saj për anëtarësimin e Serbisë në NATO. Pra, e ardhmja e FAK-ut tani më nuk është çështje e cila mund të zgjidhet vetëm në Kuvendin e Kosovës dhe në dialogun e brendshëm me serbët vendorë siç ka mundur të ndodhë në mandatin e kaluar.
Lista Serbe është e dirigjuar plotësisht nga Qeveria e Serbisë dhe e detyron Kosovën edhe për ndryshimin e Kushtetutës”, ka thënë Naim Maloku, ekspert i sigurisë.
Ai ka vlerësuar se në mandatin e kaluar është dashur t’u plotësohen kërkesat minoriteteve dhe të mbyllet çështja e transformimit të FSK-së në Forca të Armatosura. “Siç e dinë të gjithë, ishte propozimi i qeverisë që në mandatin e kaluar të ndryshohej Kushtetuta dhe të kalohej ligji për Forcat e Armatosura në atë mandat. Deputetët serbë, por edhe ata të minoriteteve joserbe me 2/3 e votave të tyre kushtëzuan ndryshimin e Kushtetutës me vazhdimin edhe për një mandat të vendeve të rezervuara për ta.
Dihet se PDK-ja dhe AKR-ja ishin që të bëhej kjo marrëveshje me minoritetet dhe të kryhej kjo punë aq e rëndësishme për të ardhmen e ushtrisë së Kosovës dhe vetë Kosovën. Edhe AAK-ja ishte më shumë pro se kundër. Kurse VV-ja dhe LDK-ja ishin kategorike të shkohej në zgjedhje të jashtëzakonshme pa përfunduar këto ndryshime në Kushtetutë dhe pa ligj për Forcat e Armatosura”, ka treguar ai.
Për më tepër në:
http://epokaere.com/index.aspx?SID=13&PMID=2&LID=2&ACatID=1&AID=56600&Ctype=1