Fondacioni “Dr. Feti Hetemi” ka ndarë tre bursa për studentët e mjekësisë

Yllëza Terstena dhe Anesa Tërziu nga Vitia, si dhe Reis Spahiu nga Gjilani, janë tre përfituesit e bursave nga Fondacioni “Dr. Feti Hetemi”, në vlerë prej 500 euro secila, të cilat ndahen me rastin e përvjetorit të pestë të ndarjes nga jeta të mjekut dhe humanistit të njohur, Dr. Feti Hetemi, shkruan info-plus.tv.

Ndarja e bursave u bë pasi Komisioni përkatës i Fondacionit vlerësoi aplikimet e pranuara nga thirrja publike për studentët e mjekësisë. Kjo është hera e katërt që Fondacioni ndan bursa për studentë të programit të Mjekësisë që vijnë nga regjioni i Anamoravës.

Dr. Feti Hetemi, mjeku i njohur nga Vitia, u nda nga jeta më 19 gusht 2020 si pasojë e Covid-19. Përveç profesionalizmit të tij në fushën e internos dhe nefrologjisë, ai do të kujtohet edhe për virtytet e larta humane dhe kontributin e vazhdueshëm për të drejtat e popullit shqiptar.

Gjatë viteve ’90, Dr. Hetemi ishte ndër themeluesit dhe udhëheqësit e Shoqatës Humanitare “Nëna Terezë” në Viti, përmes së cilës u funksionalizuan ambulantat në disa fshatra të komunës. Në vitet ’80 si delegat i Kuvendit të Kosovës, ai ishte gjithashtu ndër iniciatorët kryesor për themelimin e repartit të Hemodializës në Spitalin e Gjilanit dhe dha kontribut të jashtëzakonshëm edhe në kohën e luftës së UÇK-së, duke ndihmuar në trajtimin e ushtarëve të plagosur.

Për veprimtarinë e tij, Dr. Hetemi është dekoruar post-mortem nga Presidentja e Republikës së Kosovës, Vjosa Osmani, dhe nga Komuna e Vitisë.

Familja Hetemi, përmes Fondacionit të krijuar në kujtim të tij, vazhdon çdo vit të mbështesë studentët e mjekësisë me qëllim të përgatitjes së kuadrove të reja në shëndetësinë vendore – profesion që Dr. Feti Hetemi e dashuroi dhe i shërbeu me vetëmohim, shkruan info-plus.tv.