Fokusi në bashkëpunim, inovacion dhe të ardhmen e administratave Doganore

Delegacioni i Doganës së Kosovës mori pjesë në Konferencën e Rajonit të Europës të Organizatës Botërore të Doganave, e mbajtur më 16–17 prill në selinë e saj në Bruksel. Konferenca mblodhi delegacione doganore nga e gjithë Evropa, me qëllim forcimin e bashkëpunimit dhe harmonizimin e prioriteteve të përbashkëta.

Në fjalën hapëse, Sekretari i Përgjithshëm i OBD-së, z.Ian Saunders, theksoi rëndësinë e administratave doganore fleksibile dhe me orientim drejt së ardhmes, të cilat përqafojnë inovacionin dhe bashkëpunojnë ngushtë për t’iu përgjigjur sfidave dhe zhvillimeve dinamike të tregtisë globale.

Punimet e konferencës u fokusuan në forcimin e bashkëpunimit rajonal, përmirësimin e qeverisjes dhe avancimin e prioriteteve të përbashkëta. Diskutimet përfshinë çështje strategjike, operacionale dhe të zhvillimit të kapaciteteve, duke vënë theks në rritjen e efektivitetit, shkëmbimin e informacionit dhe ndërtimin e administratave doganore më të qëndrueshme dhe të gatshme për të ardhmen.

Doganat e Kosovës mbeten të përkushtuara për të kontribuar në mënyrë aktive në iniciativat dhe partneritetet rajonale. Në këtë drejtim, forcimi i koordinimit, zhvillimi i kapaciteteve dhe investimi i vazhdueshëm në inovacion janë kyçe për ofrimin e shërbimeve doganore moderne dhe efikase. /2LONLINE/