Fitore e rëndësishme e Gjilanit ndaj Llapit, për një ecuri të mëtutjeshme pozitive

Gjilani ka shënuar fitore ndaj Llapit, në kuadër të javës së 16-të të Superligës së Kosovës në futboll.

Rezultati final i këtij takimi 3:0, e golat u shënuan nga Sabit Bilali, Mevlan Adili dhe Senad jaroviq.

Pra, pjesa e parë u mbyll me rezultat të barabartë 0:0, por se Gjilani shpërtheu në pjesëlojën e dytë ku tundi rrjetën kundërshtare tri herë. Kujtojmë se Gjilani luajti me një lojtar më shumë që nga minuta 2 -të pasi kapiteni i Llapit, Gnabi shkaktoi faul për karton të kuq ndaj portierit Laroshi.

Përndryshe, ishte kjo një fitore e rëndësishme për stabilitet dhe stopim të luhatjeve që i kishte skuadra “kuqebardh”, nëpër javë, pasi skuadra gjilanase që po drejtohet nga Debatik Curri, ka vazhduar me rezultate pozitive, me fitore e barazime, në pesë xhirot e fundit, pra pa pësuar humbje dhe me këtë edhe ngritje të lehta në tabelë.

Pikërisht, një ngritje për një pozitë në tabelë e mundësoi edhe kjo fitore pasi, SC Gjilani tani zhvendoset sipër Llapit, ku 22 pikët  e saj e pozicionojnë atë në vendin e gjashtë.

Kujtojmë se ndeshjen e radhës Gjilani e luan me rivalin lokal, Dritën, pra do të jetë derbi i Superligës. /2LONLINE/