Fillon procesi i formimit të grupeve vullnetare për Mbrojtje dhe Shpëtim nga Fatkeqësitë Natyrore dhe Fatkeqësitë e tjera

Drejtoria për Mbrojtje dhe Shpëtim, në Komunën e Gjilanit, në bashkëpunim me Shoqatën e Pensionistëve të TMK/FSK dhe Simpatizantëve “ELITA”, ka organizuar një takim me Kryetarët e Këshillave të Lagjeve dhe Fshatrave, si dhe me përfaqësues të Shoqatave të Gjuetarëve dhe Alpinistëve të Komunës së Gjilanit.

Qëllimi i këtij takimi ishte fillimi i procesit të formimit të grupeve vullnetare për Mbrojtje dhe Shpëtim nga Fatkeqësitë Natyrore dhe Fatkeqësitë e tjera, në lokalitetet e ndryshme të Komunës së Gjilanit.

Gjatë takimit u diskutua për rëndësinë e organizimit dhe koordinimit të komunitetit lokal në rastet emergjente, si dhe për nevojën e përfshirjes së qytetarëve në strukturat vullnetare që do të kontribuojnë në parandalimin, reagimin dhe menaxhimin e situatave të fatkeqësive natyrore.

Drejtori për Mbrojtje dhe Shpëtim, Enver Shabani vlerësoi gatishmërinë dhe interesimin e pjesëmarrësve për të qenë pjesë aktive e këtij procesi, duke theksuar se bashkëpunimi ndërmjet institucioneve dhe komunitetit është kyç për rritjen e sigurisë dhe mbrojtjes së qytetarëve.

Në fund të takimit, palët u dakorduan që bashkëpunimi të vazhdojë edhe në fazat e ardhshme të organizimit dhe trajnimit të grupeve vullnetare, me qëllim të krijimit të një rrjeti funksional dhe të qëndrueshëm të Mbrojtjes dhe Shpëtimit në të gjithë territorin e Komunës së Gjilanit.  /2LONLINE/