Fillojnë punimet në restaurimin e objekti të shkollës së parë shqipe në Stubëll

/2L ONLINE/ – Në Stubëll të Vitisë kanë filluar sot punimet në restaurimin e objektit të shkollës së parë shqipe në Kosovë. Me këtë rast Kryetari i Komunës së Vitisë, Sokol Haliti i shoqëruar nga Drejtoresha për Kulturë, Rini dhe Sport, Kaltrina Sylejmani kanë vizituar këtë objekt që është në listën e objekteve të trashëgimisë kulturore.

Sokol Haliti, Kryetar i Komunës së Vitisë, ndër tjerash tha se është i një rëndësie të veçantë të investohet në ruajtjen e objekte të trashëgimisë kulturore siç është Shkolla e parë shqipe në Stubëll. “ Më të vërtetë objektet sikurse kjo e shkollës së parë Shqipe kanë një rëndësi të veçantë për historinë tonë andaj është e një rëndësie edhe më të veçantë që ti ruajmë ato..” u shpreh Kryetari Haliti.

Ndërkaq Drejtoresha për Kulturë, Rini dhe Sport, Kaltrina Sylejmani tha se duke e ditur rëndësinë që ka ky monument, MKRS ka mbështetur projektin për restaurimin e këtij objekti . “ Shkolla e pare shqipe është monument me rendësi ne trashëgiminë arkitekturore, duke pasur parasysh këtë fakt, Ministria për Kulture, Rini dhe Sport ka mbështetur projektin për restaurimin e kësaj shkolle.” U shpreh Drejtoresha Sylejmani. Ajo tha se sipas projekti punimet pritet të përfundojnë brenda këtij viti.

Sylejmani bëri me dije se Komuna e Vitisë, si participuese në këtë projekt do të kujdesët që t’i realizoje detyrat e veta te dala nga Memorandumi i Bashkëpunimit i nënshkruar ne mes te Kryetarit Haliti dhe Ministrit Shala. Përndryshe, objekti i Shkollës së parë shqipe në Stubell gjendet edhe ne listën e trashëgimisë Kulturore për mbrojtje te përkohshme. /2L ONLINE/