Fillojnë punën pesë bashkëpunëtorë profesionalë në Gjykatën Supreme të Republikës së Kosovës

Gjyqësorit të Kosovës i janë bashkuar pesë (5) bashkëpunëtorë të rinj profesionalë, duke forcuar më tej kapacitetet e institucioneve gjyqësore në vend.

Zëvendëskryesuesja e KGJK-së, Arjeta Sadiku, u uroi mirëseardhje bashkëpunëtorëve profesionalë, duke u dëshiruar suksese në punën e tyre. Ajo theksoi se plotësimi i këtyre pozitave do të ndikojë në avancimin e sistemit gjyqësor.

Sadiku shprehu gatishmërinë për mbështetjen e bashkëpunëtorëve profesionalë dhe kërkoi angazhim nga ana e tyre me qëllim të rritjes së efikasitetit, transparencës dhe llogaridhënies në gjykatat e vendit.

Sekretariati i Këshillit Gjyqësor të Kosovës është i vendosur të zbatojë me përpikëri detyrimet ligjore për krijimin e kushteve të domosdoshme për punën e gjykatave, si dhe të respektojë parimet e ligjshmërisë, transparencës dhe meritokracisë gjatë zhvillimit të procedurave për përzgjedhjen e punonjësve të rinj.