Festivali “Lyra” në Gjilan: 17 vite magji muzikore për fëmijë

Mbrëmja e 1 Qershorit në Gjilan solli emocione, art, buzëqeshje dhe shumë talent në edicionin e 17-të të Festivalit të Këngës për Fëmijë “LYRA” – festivalit të parë të këtij lloji në Anamoravë, i cili tashmë prej 17 vitesh vazhdon të mbetet një ndër ngjarjet më të rëndësishme muzikore për fëmijë në Kosovë.

Në këtë edicion u prezantuan 17 këngë të reja, të papublikuara më parë, me pjesëmarrës nga të gjitha qytetet e Kosovës. Gara u zhvillua në dy kategori dhe u karakterizua nga një frymë moderne artistike, me këngë bashkëkohore, interpretime të fuqishme dhe realizim skenik mbresëlënës.

Nën drejtimin artistik dhe organizativ të drejtorit të festivalit, Kushtrim Jakupi, skena e “LYRA 2026” u shndërrua në një spektakël të vërtetë teknologjik dhe vizual, e pasuruar me animacione, grafika moderne dhe skenografi dinamike që i dhanë festivalit dimension evropian.

Mbrëmjen e udhëhoqi me profesionalizmin dhe karizmën e tij aktori dhe moderatori i njohur kosovar Fatmir Spahiu – Bufi, i cili edhe kësaj radhe ishte në nivelin më të lartë artistik.

Festivali u hap simbolikisht me këngën “1 Qershori”, duke përçuar mesazhin e bukur të Ditës Ndërkombëtare të Fëmijëve dhe vetë misionin që mbart “LYRA” prej vitesh – promovimin e botës së pastër dhe kreative të fëmijëve.

Programi artistik u begatua edhe me performancat energjike të grupit “Dancing House”, të cilat sollën ritëm dhe atmosferë festive gjatë gjithë mbrëmjes.

Një nga momentet më emocionale të natës ishte interpretimi live i Kira Demolli dhe Albina Jakupi Demolli – nga vajza dhe mbesa e profesorit të ndjerë, ikonës së muzikës për fëmijë prof. Isa Jakupi. Kjo këngë, e rikthyer pas shumë vitesh, shërbeu si një homazh prekës për njërin nga themeluesit e festivalit dhe për krijimtarinë e tij me vlera të jashtëzakonshme artistike e edukative.

Para shpalljes së fituesve, organizatori rezervoi edhe “Minutat e Talenteve”, ku publiku pati rastin të shijojë interpretime të jashtëzakonshme instrumentale nga Blodin Canaj në perkusione, Puhiza Sadiki në piano dhe Orhidea Jakupi në violinë.

Juria profesionale, e përbërë nga muzikologu Sami Piraj, redaktorja e muzikës Shqipe Spahiu dhe pedagogia universitare Anna Frangu, vlerësoi lart nivelin artistik të festivalit, duke potencuar se të gjitha këngët ishin fituese, sepse ishin pjesë e festivalit më të mirë për fëmijë në Kosovë, ndërsa fituesit u përcaktuan vetëm nga nuancat artistike.

FITUESIT E “LYRA 2026”

Kategoria II
Çmimi i Parë – Linea Hasani
Solistja më e mirë – Aria Rrahmani
Çmimi i Publikut – Lea Qehaja
Çmimi Special “Lyra 2026” – Melos Morina
Interpretimi më i mirë – Reina Hyseni
Çmime të dyta – Klejdi Abazi & Noene Krasniqi
Çmimi i tretë – Liana Bllaca

Kategoria I

Çmimi i Parë – Amra Salihu
Solistja më e mirë – Liana Berisha
Çmimi i Publikut – Qelesta Morina (5 vjeç)
Çmimi Special “Lyra 2025” – Hana Abazi
Çmimi Special “Prof. Isa Jakupi” – Vlona Sahiti
Çmime të dyta – Bora Salihu & Andra Selimi
Çmime të treta – Anila dhe Nila Hasani

Mbrëmja u përmbyll me interpretimin e këngës fituese të kategorisë së parë, mes duartrokitjeve të gjata dhe emocioneve të publikut.

Këtë vit qmimi “LYRA” për personalitete të cilat kontribuan në fushën e muzikës ju nda profesor Zekë jusufit – për kontribut në edukimin e shumë brezave në fushën e muzikës. Plaketi ju nda nga drejtori i festivalit z. Kushtrim Jakupi.

Drejtori i festivalit, Kushtrim Jakupi, u shpreh shumë i kënaqur me rrjedhën organizative, nivelin artistik dhe kualitetin e këngëve, duke falënderuar përzemërsisht të gjithë mbështetësit e festivalit: Komunën e Gjilanit, Bankën TEB, RTK-në, prindërit dhe të gjithë ata që vazhdojnë ta mbështesin rrugëtimin e “LYRA”-s.

“LYRA” vazhdon të mbetet një skenë ku lindin ëndrra, kultivohet arti dhe frymëzohen gjenerata të reja artistësh. /2LONLINE/