Faleminderit Bashkatdhetarë!

Leonard Miftaraj

/2L ONLINE/ – Ne pamundësi që të ju shkruaj secilit, të dashur bashkatdhetarë nga e gjithë bota dua që përmes këtij shkrimi të ju falënderoj nga zemra që po e gjallëroni Kosovën, apo, në të kundërtën nuk po e lejoni që të vdes. Nuk ka dyshim që jeni pjesa më besnike e popullit përkundër që shteti i këtij populli nuk ua kthen as minimalisht të mirat karshi sakrificës që e bëni çdo ditë për Kosovën dhe kombin shqiptar në përgjithësi.

Sigurisht se dëshira për ta vizituar atdheun dhe familjen fillon të zbehet po sa ti afroheni Kosovës. Duke u munduar nëpër kufijtë rreth Kosovës me orë të tëra sidomos nga Serbia si rezultat i mosfunksionimit të një politike te jashtme, duke e vërejtur padrejtësinë politike e ekonomike të pushtetit ndaj qytetarëve të cilët njëkohësisht janë familjarët tuaj, duke e parë mosgatishmërinë që shteti të nisë projekte për zhvillim ekonomik ne bashkëpunim me kapitalin dhe përvojën tuaj, nuk ka dyshim se i tërë entuziazmi dhe lumturia që po riktheheni në vendlindjen tuaj do të venitet.

Shtohet irriitimi dhe pakënaqësia kur tentohet edhe të manipulohet me juve duke u munduar që qyteteve tone ti vihet mbi, një petk i hareshëm e festiv si orvatje për ta mbuluar gjendjen e rëndë. Fjala është për koncertet dhe manifestimet e ndryshme të cilat komunat si pjesë e programit ‘’mirëseardhës’’ i organizuan të cilat po të analizohen thellë e thellë nuk kanë tjetër qëllim përpos se të tentohet të manipulohet me ju, pa i harruar edhe pritjet me bakllava ne aeroportin Adem Jashari.

Por ju mos u dorëzoni sepse e ardhmja pikërisht pse është e ardhme ka shpresë. E ardhmja është mundësi për ne dhe ju duke u bashkërenduar sepse ju jeni ne dhe ne jemi ju. Kosova nuk mundet pa ju e ne nuk do të dorëzohemi derisa Kosovën ta bëjmë siç doni ju, siç e meritoni dhe siç duhet jetë.

Faleminderit bashkatdhetar!