Fajtor Qeveria!
/2L ONLINE/ – Rexhep Kadriu, i sapo rizgjedhur kryetar i Degës së Aleancës për Ardhmërinë e Kosovës (AAK), Dega në Gjilan, më kot kishte shpresuar se urimin e parë, për këtë besim të marrë nga struktura, anëtarësia dhe qytetarët/simpatizusit e AAK-së, për t‘i prirë AAK-së edhe për një mandat, do ta kishte nga kreu i këtij subjekti Ramush Haradinaj. Kjo nuk u bë, për faktin se pikërisht me 17 qershor kur mbahej Kuvendi i AAK-së së Gjilanit, në të njëtën ditë kryetari i AAK-së, Ramush Haradinaj, u ndalua në Slloveni shkaku i një fletarresti të lëshuar nga Serbia në vitin 2004.
Kadriu ka thënë për Portalin 2L ONLINE, se këtë e kanë përjetuar keq, si një goditje të rëndë për AAK-në, sepse kryetari i AAK-së, Ramush Haradinaj, të gjitha proceset nga viti 2004, të gjykatës ndërkombëtare i ka kaluar dhe ka dëshmuar pastërtinë e luftës çlirimtare të UÇK-së. Ai tha se kjo është një padrejtësi e radhës që i bëhet kryetarit Haradinaj, në proceset më të rëndësishme që po i kalon Kosova, gjatë kësaj periudhe.
“Për ne, si degë e AAK-së, është e papranueshme sjellja e autoriteteve sllovene karshi një ish kryeministri dhe deputeti të Parlamentit të Kosovës. Po ashtu për ne, është e papranueshme sjellja e Qeverisë së Kosovës karshi njerëzve të luftës çlirimtare, sepse krejt kjo është rrjedhojë e keqqeverisjes së vendit, qysh prej qeverisjes së kaluar, sepse për pastrimin e listave është dashtë të merret Qeveria e Kosovës e jo tani të kërkohet, siç kërkon Hashim Thaçi, ndihmë në pastrimi ne listave në dialogun me Beogradin”, ka thënë Kadriu.
I pari i AAK-së në Gjilan, thotë se kjo Degë është në koordinim të vazhdueshëm me qendrën dhe janë duke marrë pjesë edhe në protestën paqësore të organizuara para ambasadës sllovene, madje strukturat e Degës në Gjilan kanë qenë mbrëmë tërë natën në këtë protestë, do të jenë edhe sot dhe në ditët në vazhdim, deri në lirimin e kryetarit Haradinaj dhe kthimin e tij në Kosovë.
“Ftojë njerëzit e AAK-së, që marrin pjesë në protestë, për ta bërë protestën në mënyrë dinjitoze e të qetë, sepse qëllimi është lirimi sa më i shpejtë i kryetarit të AAK-së Ramush Haradinaj, e jo dëmtimi i pronës”, ka thënë Rexhep Kadriu, kryetar i AAAK-së dega në Gjilan, njëherësh nënkryetar komune. Sipas tij, Haredinaj duhet të lirohet e të kthehet në Kosovë sa më parë, dhe kjo nuk do të duhet të ndodh kurrë më, dhe për këtë duhet të bëhet e përgjegjshme Qeveria e Kosovës. /2L ONLINE/
Foto nga arkivi
Foto nga Kuvendi i AAK