Është pensionuar Sinan Sadiku, udhëheqës i Zyrës së Punësimit në Kamenicë

Është pensionuar Sinan Sadiku, udhëheqës i Zyrës së Punësimit në Kamenicë, por I njohur nga të gjithë për kontributin e tij të madh edhe në fushën e letërsisë, shkrimtar, autor i disa veprave, kritik letrar, publicist, njëri nga themeluesit e Klubit Letrar “Nositi”, kontributdhënës i madh në zhvillimin e jetës kulturore, me theks të veçantë në Kamenicë, Gjilan, por edhe më gjerë.

Në fushën e letërsisë ka ofruar me shumë sukses vlera, që frymëzojnë secilin lexues dhe për ju lexues po e risjellin një shkrim të mëhershëm, në lidhjen e mëposhtme, të shkrimtarit e kritikut letrar, Nexhat Rexha, për portretin letrar të Sinan Sadikut.

LEXO:  PORTRETI LETRAR I SINAN SADIKUT

Përndryshe, kur jemi te pensionimi i tij nga detyra që ushtronte deri më sot, kujtojmë se detyrën e Udhëheqësit të Zyrës së Punësimit në Kamenicë e ka kryer prej fillimit të korrikut të vitit 1999, ose gati 26 vjet e 4 muaj, duke qenë përherë në shërbim të qytetarëve që kanë kërkuar punë dhe të punëdhënësve që kanë kërkuar punëtorë.

Përndryshe, ja fjala e tij e plotë me rastin e pensionimit të parakohshëm.

NË PENSION TË PARAKOHSHËM

Pikërisht sot, më 31.10.2025, kur u përurua panorama poetike “Det ëndrrash” e hartuar nga unë, ishte dita e fundit e imja në detyrën e Udhëheqësit të Zyrës së Punësimit në Kamenicë. Prej 01.11.2025, për shkak të problemeve shëndetësore, do të jem pensionist i parakohshëm.

Detyrën e Udhëheqësit të ZP-së në Kamenicë e kam kryer prej fillimit të korrikut të vitit 1999, ose gati 26 vjet e 4 muaj. Në vitin 1999 kemi filluar prej zeros, sepse në objektin ku ka vepruar Enti i Punësimit dhe në objektin e komunës qe vendosur KFOR-i rus i cili nuk na pati lejuar ta merrnim asnjë dokument.

Falë angazhimit të përbashkët me personelin e ZP-së dhe bashkëpunimit me nivelin qendror e rajonal shpejt e patëm funksionalizuar institucionin. Kemi qenë në shërbim të njerëzve që kanë kërkuar punë dhe të punëdhënësve që kanë kërkuar punëtorë.

Me personelin e ZP-së në Kamenicë kemi punuar dhe bashkëpunuar me profesionalizëm, korrektësi e mirëkuptim të plotë dhe në mënyrën më të mirë të mundshme i kemi kryer detyrat tona, duke u dalë në ndihme të papunësuarve që kanë kërkuar punë dhe duke i realizuar Masat Aktive të Tregut të Punës (MATP) të dizajnuara nga niveli qendror në interes të punëkërkuesve dhe të punëdhënësve.

E di që nevojat dhe kërkesat kanë qenë më të mëdha, por buxheti i ndarë për këtë fushë nuk ka qenë i mjaftueshëm, po ka pas edhe kufizime të shumta të parapara me ligje dhe me akte nënligjore.

Gjatë punës në pozitën e Udhëheqësit të ZP-së në Kamenicë kemi punuar dhe bashkëpunuar si është më së miri me personelin e ZP-së në Kamenicë, me drejtorin e Qendrës Rajonale për Punësim në Gjilan dhe personelin e asaj qendre.

Deri në vitin 2017, kur është themeluar Agjencia për Punësim e Republikës së Kosovës (APRK), ka funksionuar niveli rajonal dhe drejtori i asaj qendre ka qenë edhe drejtor i imi. Thuajse gjatë tërë kohës drejtor ka qenë z. Xhevat Aliu, një punëtor i madh, i përpiktë dhe principiel me të cilin ka qenë kënaqësi të punosh.

Prej vitit 2017 nuk ka nivel rajonal dhe Udhëheqësit e Zyrave të Punësimit i raportojnë drejtpërsëdrejti Drejtorit të Përgjithshëm të APRK-së.

Po ashtu kemi bashkëpunuar shumë mirë me Udhëheqësin e ZP-së në Viti z. Isuf Behluli dhe Udhëheqësit e Zyrave të tjera dhe kuptohet me nivelin qendror, me Drejtoreshën e APRK-së, znj. Jehona Namani Rexha dhe me personelin e të gjitha shërbimeve profesionale.

Kemi bashkëpunuar shumë mirë me Qendrën për Punë Sociale në Kamenicë dhe me drejtorin e saj z. Rifat Hajdari, me kryetarin e komunës z. Kadri Rahimaj dhe thuajse me të gjitha drejtoritë komunale.

Andaj, të gjitha këto institucione dhe njerëzit që i udhëheqin ose punojnë në to i falënderoj për bashkëpunim korrekt, duke ju dëshiruar shumë suksese në punën e tyre.  /2LONLINE/