Është mbajtur mbledhja e radhës e Këshillit Komunal për Siguri në Bashkësi

Në Komunën e Kamenicës është mbajtur mbledhja e radhës e Këshillit Komunal për Siguri në Bashkësi (KKSB), e udhëhequr nga Kryetari i Komunës, Kadri Rahimaj, me pjesëmarrjen e anëtarëve të këtij këshilli dhe përfaqësuesve të institucioneve përkatëse.

Gjatë mbledhjes u shqyrtuan dhe u diskutuan këto pika të rendit të ditës:

1. Miratimi i procesverbalit nga mbledhja e kaluar;

2. Informata mbi gjendjen e sigurisë në Komunën e Kamenicës, me theks të veçantë në sigurinë në fshatrat rurale;

3. Parandalimi i zjarreve në objektet administrative dhe shkollore, si dhe funksionimi i pajisjeve kundër zjarrit;

4. Të ndryshme.

Rendi i ditës dhe procesverbali i mbledhjes së kaluar u miratuan unanimisht nga të gjithë anëtarët e pranishëm.

Në kuadër të pikës së dytë, komandanti i Stacionit Policor në Kamenicë paraqiti informata lidhur me gjendjen e sigurisë në komunë, duke informuar të pranishmit për situatën aktuale dhe angazhimin e Policisë së Kosovës në ruajtjen e rendit dhe sigurisë publike.

Sa i përket pikës së tretë, u bë e ditur se të gjitha institucionet arsimore në Komunën e Kamenicës janë të pajisura me aparate kundër zjarrit. Gjithashtu, u theksua se nxënësit dhe personeli arsimor janë trajnuar nga zjarrfikësit për përdorimin e këtyre pajisjeve dhe për mënyrën e reagimit në raste emergjente.

Në kuadër të pikës “Të ndryshme”, u diskutua për rastet e dhunës në familje në Komunën e Kamenicës. Me këtë rast, u kërkua që në mbledhjen e ardhshme të paraqitet një raport i detajuar mbi rastet e evidentuara të dhunës në familje.

Mbledhja përfundoi me theksimin e rëndësisë së bashkëpunimit të vazhdueshëm ndërmjet institucioneve përgjegjëse, me qëllim të përmirësimit të sigurisë dhe mirëqenies së qytetarëve të Komunës së Kamenicës. /2LONLINE/