Është dashur të mblidhet Këshilli i Sigurisë

Drejtori i Qendrës Kosovare për Studime të Sigurisë, Florian Qehaja, ka thënë se Këshilli i Sigurisë së Kosovës, i cili drejtohet nga kryeministri Thaçi është dashur të mblidhet pas arrestimeve të personave të dyshuar për përfshirje në terrorizëm.

Qehaja ka thënë se ka qenë e nevojshme mbajtja e mbledhjes së Këshillit të Sigurisë, pas arrestimit të dyshuarve për përfshirje në terrorizëm, ku nga ky takim sipas tij, do të merrej një mendim gjithëpërfshirës i akterëve të institucioneve. “Këshilli i Sigurisë është dashur të mblidhet, në këtë rast ta trajtojë këtë çështje dhe t’i japë konkluzionet. Arsyeja pse është i nevojshëm ky Këshill të mblidhet në këso raste është se i merr në mënyrë gjithëpërfshirëse mendimet e të gjithë akterëve në institucionet e Kosovës. Në këtë rast marrja e mendimeve të të gjitha institucioneve është shumë e rëndësishme”, ka deklaruar Qehaja për “Radion Evropa e Lirë”.

Operacionet e fundit të organeve të rendit kanë sjellë si rezultat mbi 40 persona të arrestuar nën dyshimet se ishin përfshirë në lufta fetare në Siri e Irak, duke u vënë në krah të organizatave të shpallura terroriste si ISIS e Al Nusra.