Epopeja e UÇK-së, e datave 5, 6 dhe 7 Mars, është krenaria jonë kombëtare

Nga: Krenare Latifi Kqiku – /Kryesuese e Kuvendit Komunal të Gjilanit. Fjala e saj në Seancën Solemne kushtuar Epopesë së UÇK-së/

***

Jemi mbledhur sot në këtë seancë solemne për të nderuar Epopenë e lavdishme të Jasharajve.

Sot, mbarë kombi shqiptar përkulet me nderim të thellë para sakrificës sublime të Komandantit legjendar Adem Jashari, familjes Jashari dhe bijve e bijave të Kosovës që u flijuan në altarin e lirisë.

Beteja epike e familjes Jashari, me në krye Komandantin legjendar të Ushtrisë Çlirimtare të Kosovës, ku pleq, gra e fëmijë sakrifikuan jetën, vuri gjakun e gjithë familjes Jashari në themelet e Kosovës së lirë dhe të pavarur.

Se sa i shtrenjtë është çmimi i lirisë, më së miri e dëshmoi familja Jashari para 28 vitesh, me sakrificën e tyre vetëflijuese. Ata i treguan mbarë botës se liria e popullit tonë është e shenjtë dhe paguhet shtrenjtë.

Epopeja e UÇK-së, e datave 5, 6 dhe 7 Mars, është krenaria jonë kombëtare. Lufta e lavdishme për lirinë e Kosovës, gjaku i dëshmorëve dhe sakrifica e martirëve tanë janë themeli i fortë mbi të cilin ndërtohet e sotmja dhe e ardhmja e popullit të Kosovës dhe e shqiptarëve kudo që ndodhen.

Sot, pas 28 vitesh, në Kosovën e lirë dhe të pavarur, fëmijët tanë, nga çerdhet, shkollat fillore e të mesme, me krenari e lavdi mësojnë këngë e poezi për familjen dhe heroizmin e Jasharajve.

Sot, Prekazi vizitohet nga qindra e mijëra shqiptarë nga të gjitha trojet shqiptare si vendi i shenjtë i sakrificës, i cili u bë shembull unik në historinë më të re të Kosovës.

Lavdi për jetë Komandantit legjendar të UÇK-së, Adem Jashari, dhe heronjve të Prekazit!

Lavdi bijave dhe bijve të Kosovës dhe të mbarë kombit shqiptar që derdhën gjakun e tyre në themelet e Kosovës së lirë dhe të pavarur!  /2LONLINE/