Ekspozitë personale e Avni Behlulit

Ekspozitë personale e profesorit Avni Behlulit

Kurator: Gani Bytyqi

Ftoheni të merrni pjesë në ekspozitën personale të artistit Avni Behluli, e cila do të hapet më:

17 tetor 2025 (e premte)
Ora 18:00
Galeria e Arteve, Gjilan

Në këtë ekspozitë, artisti Avni Behluli prezanton një pjesë të krijimtarisë së tij shumëdimensionale – skulpturë, instalacion, vizatim dhe pikturë.

Ky aktivitet organizohet në nderim të pensionimit të tij, si një falënderim për gjithë kontributin e tij në arsim dhe art.

(fragment nga teksti i parathënies së katalogut të ekspozitës)

Kuratori: Gani Bytyqi

Në veprën artistike të Avni Behlulit shpalosen epokat, ndërthuren shekujt, jetësohen ngjarjet, skaliten personazhet. Aty shpërfaqen portretet e heronjve, lexohen e kujtohen ngjarjet historike dhe tragjika e tyre. Krijohet mbamendja dhe përjetësohet historia. Aty takojmë luftëtarë e heronj të përmasave kreshnike, si ata të legjendave të lashta. Shohim skena me thyerje shpatash, gërshetim predhash, flijime e rënie në fronte betejash. Aty ndiejmë trishtim për humbje të dhimbshme, por edhe krenari për fitore të mëdha. Por, në veprën e Avniut jetësohen edhe ndjenja më sublime, si dashuria e shenjtërimi i jetës dhe krijimi e mbrojtja e saj. Pastaj kultivimi, ruajtja dhe bartja e trashëgimisë socio-kulturore e filozofike, si testament brezash.

Avniu, me skulpturën e tij, sikur i ka përbashkuar kohët, epokat, shekujt. Sikur e ka zënë me dorë amshimin, për ta sjellë para nesh, si komunikim artistik, si raport ndërmjet jetës, historisë dhe artit, në mënyrë që publiku të mund të krijojë raportin e tij me kohën dhe me artin.

Arti i Avniut është mit. Ai është miti i së kaluarës. Është miti i atdheut dhe i lirisë së tij. Ai është miti i flijimit të luftëtarit. Arti i Avniut është miti i mbijetesës sonë. Ai është miti për femrën. Miti i amësisë së saj. Në veprën e Avniut mit është vendlindja e tij. Është gjuha dhe autoktonia. Është tradita kulturore.

Mit, është vetë arti.   /2LONLINE/