Ekspertë sporti në çdo shkollë, plan i ri në Kamenicë

Drejtori i Drejtorisë Komunale të Arsimit, në Komunën e Kamenicës, Selami Klaiqi, ka zhvilluar një takim të rëndësishëm me bashkëpunëtorë profesionalë nga fushat sportive, përkatësisht në futboll, volejboll, basketboll dhe atletikë.

Gjatë këtij takimi është diskutuar dhe është dakorduar që në secilën shkollë të angazhohen profesionistë të kualifikuar nga secila disiplinë sportive, duke përfshirë futbollin, basketbollin, volejbollin dhe atletikën. Ky hap synon avancimin e edukimit fizik dhe identifikimin e hershëm të talenteve sportive tek nxënësit.

Drejtori Klaiqi ka thënë se përmes këtij organizimi, çdo nxënës do të ketë mundësinë që të zhvillojë talentin e tij në sport, duke pasur mbështetjen e plotë të Drejtorisë së Arsimit nëpërmjet ekspertëve të fushave përkatëse.

Ai po ashtu është shprehur se Drejtoria e Arsimit mbetet e përkushtuar në krijimin e kushteve më të mira për zhvillimin e gjithanshëm të nxënësve dhe promovimin e aktiviteteve sportive në institucionet arsimore. /2LONLINE/