Edhe Daci do të votonte pro themelimit të Gjykatës Speciale

Ish-kryetari i Kuvendit të Kosovës, Nexhat Daci, i ka kritikuar liderët e institucioneve të Kosovës dhe deputetët se nuk kanë ditur të sillen si duhet në raport me opinionin në Kosovë sa i përket themelimit të Gjykatës Speciale.

Ai ka thënë se po të ishte deputet i këtij institucioni do të votonte pro themelimit të Gjykatës Speciale pasi, sipas tij, themelimi i kësaj gjykate ka ardhur si pasojë e dokumentit të votuar në Asamblenë Parlamentare të Këshillit të Evropës.

“Është dashur t’i themi po Gjykatës Speciale sepse është dokument i një institucioni, pjesë e të cilit Kosova lufton të jetë që dhjetë vjet. Bindja ime ka qenë e qartë, se Kosovës nuk i është dashur Gjykata Speciale, por kur është bërë dokument zyrtar i institucionit më të lartë të Evropës, është dashur një përgjigje adekuate”, ka thënë Daci në një intervistë për “Epokën e re”.

Ai ka thënë se mandati i Gjykatës Speciale nuk do të jetë më pak se pesë vjet dhe nuk beson se kjo gjykatë do të kryejë punë për pesë vjet.