E mjerueshme: Gjilani me vetëm një vend parkim për persona me aftësi të kufizuara!
/2L ONLINE/ – Gjilani ka vetëm një vend parkim të rezervuar për persona me aftësi të kufizuara edhe ai vend nuk i plotëson standardet e lejuara. Ishin dy vende parkimi dhe pushtetarët që nga 2011-ta ishin krekosur se do të bëjnë një punë të mirë në shtimin e këtyre vendeve dhe siç mëson 2L ONLINE, madje ishte edhe një vendim për t’u shtuar ky numër në nëntë, por ja që tani jemi në 2015-tën dhe kemi një të vetëm, vend parkim të shenjëzuar për persona me aftësi të kufizuar, dhe edhe ai është jashtë standardeve.
Këtë e ka konfirmuar për Portalin 2L ONLINE, edhe Fatmir Shurdhani, menaxher i Shoqatës Handakos në Gjilan.
“Drejtoria e Shërbimeve Publike në vitin 2011 ka lëshua një vendim i cili ka lejua 9 parkingje të rezervuara për persona me aftësi të kufizuar, dhe atëherë krenohej kjo drejtori se kinse ka bërë punë te mira duke u thirrur në shumëfishim të parkingjeve për këtë kategori. Në fakt, në Komunën e Gjilanit është vetëm një parking i rezervuar për persona me aftësi të kufizuara edhe ai parking nuk i plotëson standardet e lejuara”, ka thënë Shurdhani.
Ai tha se kanë takuar, ditë më parë, edhe zyrtarin e Drejtorisë së Shërbimeve Publike, Samet Robellin të cilin e kanë njoftuar edhe njëherë me problemet e kësaj kategorie, është diskutuar për qasje të personave me aftësi te kufizuara në institucionet lokale, si dhe qasja nëpër rrugët e Komunës së Gjilanit dhe parkingjet e rezervuara për persona me aftësi të kufizuara.
Fatmir Shurdhani dhe Samet Robelli
“Nga viti 2014 Handikosi është duke implementuar një projekt që ka shtrirje në nivel vendi e ka të bëj me identifikimin e problemeve dhe vështirësitë e personave me aftësi të kufizuar nëpër institucionet lokale. Handikosi së bashku me grupet lehtësuese paraprakisht ka bërë identifikimin e disa barrierave e që kryesisht këto janë identifikuar ku frekuentimi i qytetarëve është më i madh. Gjithashtu është bërë identifikimi i barrierave edhe nëpër objektet komunale”, ka thënë Shurdhani.
Ai tha se i kanë prezantuar të gjitha problemet këtij zyrtari të komunës me shpresë se ai i dërgon në adresë të caktuar te shefat e tij dhe se në këtë drejtim do të ndërmerren masa.
“Personat me aftësi te kufizuar mbesin me shpresë se Drejtoria përkatëse do t’i shqyrtoj të gjitha barrierat e prezantuara, të evitohen ato dhe të mundësohet qasja e plotë dhe e pavarur, për të gjithë qytetarët e komunës së Gjilanit, në mënyrë që edhe kjo kategori të njihet e barabartë në shoqëri”, ka thënë Fatmir Shurdhani, menaxher i Handikosit n Gjilan. /2L ONLINE/