Dy skuadrat gjilanase në kërkim të pikëve të plota

Në kuadër të javë së 25-të të Superligës së Kosovës në futboll, sot zhvillohen dy ndeshje, në të cilat do të jenë edhe skuadrat gjilanase, FC Drita e SC Gjilani, që ndaj kundërshtarëve të tyre në këtë xhiro, Dukagjinit e Prishtinës, synojnë pikë të plota.

Drita, që është liderë e tabelës do të jetë skuadër udhëtuese në Klinë, ku e pret ballafaqimi me Dukagjinin, një mundësi e mirë që me tri pikë të reja ta ruaj diferencën e pikëve me ndjekësit e tij për titull, transmeton 2LONLINE.com.

Aktualisht, Drita ka 53 pikë, 10 pikë më shumë se Ballkani që e ndjekë pas, por që e ka të luajtur ndeshjen e kësaj jave, andaj skuadra bardh e kaltër me fitore eventuale do ta rikthej diferencën prej 13 pikëve me të dytin.

Në anën tjetër, Gjilani  do të jetë skuadër mikpritëse në këtë xhiro, ajo e “gostit” skuadrën e Prishtinës, një ndeshje kjo e rëndësishme por edhe e vështirë pasi po ballafaqohen dy skuadrat  që synim e kanë pozitën në tabelë që do t’ia mundësojë një vend në garat evropiane. Andaj, siç janë shprehur edhe drejtuesit e klubit, synimi është rezultati maksimal, që tri pikë të mbesin në Gjilan, transmeton 2LONLINE.com.

Aktualisht, Gjilani ndodhet në pozitë ne katërt me 34 pikë,  e Prishtina e gjashta me 31 pikë.

Të dyja këto ndeshje, Dukagjini – Drita dhe Gjilani – Prishtina, të kësaj jave (25), nisin nga ora 14:00.

Kujtojmë se të premten, Ballkani mundi Ferizaj (2:1), ndërsa të dielën zhvillohen edhe dy ndeshjet tjera përmbyllëse të kësaj xhiroje: Llapi – Suhareka dhe Feronikeli 74 – Malisheva.  /2LONLINE/