Dy rrugë të qytetit të Vitisë së shpejti do të bëhen me trotuar dhe ndriçim publik

/2L ONLINE/ – Kanë filluar sot punimet në ndërtimin e trotuarit dhe ndriçimit publik në rrugën “Dëshmorët e Kombit” dhe “ Lidhja e Prizrenit “ qe gjendën në qytetin e Vitisë. Ky projekt përndryshe realizohet me bashkëfinancimin e Projektit DEMOS dhe Komunës së Vitisë. Ndërkaq në ceremoninë e përurimit të fillimit të punimeve ka marrë pjesë Kryetari i Komunës së Vitisë, Sokol Haliti me bashkëpunëtor por edhe banorët të kësaj pjese.

Sokol Haliti, Kryetar i Komunës së Vitisë, duke folur para qytetarëve lidhur me realizimin e projektit në fjalë ndër tjerash tha se komisioni i formuar nga projekti Zviceran DEMOS dhe komuna e Vitisë do të përkujdesën që projekti i ndërtimit të trotuarit dhe ndriçimit publik të përfundoj me cilësinë e duhur.

“Plani dinamik dhe kualiteti i këtij projekti do të realizohet në afatin e paraparë dhe përfaqësuesit e kompanisë së zgjedhur dhe komisionit të përbashkët nga DEMOS-i dhe Komunës nuk do të lëshojnë pe rreth kualitetit dhe dinamikës” u shpreh Kryetari Haliti.

Ai ndër tjerash tha se Komuna e Vitisë është në dijeni me nevojat e banorëve të kësaj ane duke paralajmëruar se së shpejti do të fillon edhe rregullimi i një parkingjeve të reja pranë varrezave të dëshmorëve, qytetit dhe të fshatit Kabash duke potencuar se komuna do të shikoj mundësitë që në këto lagje ku edhe filluan punimet e trotuarit dhe ndriçimit publik të përforcohet kapaciteti i furnizimit me ujë të pijes.
Ai po ashtu shpalosi idenë e Qeverisë Komunale që të ndërlidhë tregun e gjelbër me tregun e Kafshëve. Gjatë prononcimit të tij, kryetari Haliti në veçanti ka falënderuar projektin DEMOS që është bashkëfinancues i këtij projekti por edhe të shumë projekteve të tjera të cilat sipas tij janë në interes të qytetarëve vitias.

Vlera e tërësishme e ndërtimit të trotuarit dhe ndriçimit publik që do jetë në gjatësi prej afro 2 km përgjatë këtyre dy rrugëve është rreth 110 mijë euro, ku projekti DEMOS ka participuar me 50 mijë euro ndërsa pjesa tjetër nga vetë Komuna e Vitisë. /2L ONLINE/