Dy minutat e Gjilanit!

(2L ONLINE) – Fitore për t’u këndellur. Skuadra e Gjilanit ka lënë prapa humbjen në derbi ndaj Llapit ndërkohë ka fituar një derbi tjetër ndaj Fushë Kosovës dhe atë për dy minuta.

Të besuarit e Musa Selimit ia kanë dalë të mposhtin fushë kosovarët në ndeshjen derbi të javës së tetë të Ligës së Parë. Një fitore që vjen vetëm pas minutës së 60-të, pasi deri në atë kohë skuadra vendase ishte në disavantazh por këtë rikthim e sheh mjaft pozitiv trajneri i skuadrës së Gjilani, Musa Selimi.

‘’Kemi hyrë në këtë ndeshje pa pesë futbollistë titullar. Mungesa e Filonit Shaqiri, Ylber Kastrati, Zgjim Mustafa, Lirian Ferati e Shqipdon Ademi është mjaft e madhe për këtë klub. Kemi hasur në një kundërshtarë mjaft të fortë që diti ta menagjojë mirë pjesën e parë, mandej dështimi i penaltisë dhe rasteve tjera na pamundësoi të merrnim më lehtë frymë. Këto përmbysje që po na përcjellin nga fillimi i kampionatit po na e mbajnë gjallë shpresat për rikthim në elitë’’, përfundoi Selimi.

Disavantazhi dhe penaltia e huqur

Ndeshja nisi mjaft mirë me vendasit në rast për të rrezikuar, mirëpo goditja e Maliqit u bllokua nga Kida që evitoj më të keqen. Shumë shpejt gjërat do të ktheheshin në bumerang. Një harkim të Burim Shalës në gol e ka kthyer Muhabi Bushi që përvidhet më së miri brenda zonës së vendasve dhe shënon për epërsinë e udhëtuesve.

Gjilani do të kishte mundësi menjëherë ta barazonte rezultatin, por mundësinë e artë e lëshoi nga dora Besart Morina. Penaltinë e fituar nga Ilir Blakçorri nuk ia doli ta konkretizojë Morina duke gjuajtur drejt në portierin Statovci që tregohet shpëtimtar për skuadrën e tij.

Në disavantazh djelmoshat gjilanas i vizituan dhomat e zhveshjes, ndërkohë pjesa e dytë pritej me padurim.

Rikthim për dy minuta

Edhe njëherë vendasit do të gjendeshin në vështirësi deri sa Krasniqi i mysafirëve gjuan për mrekulli drejt portës por intervenimi i Malokut ishte edhe më i mrekullueshëm. Kur po zhvillohej minuta e 60-të e ndeshjes, vendasit fitojnë edhe një penalti, ishte sërish Blakçorri që u pengua brenda zonës dhe gjyqtari Kastrati për të dyten herë në ndeshje tregon për në pikën e bardhë. Kësaj rradhe përgjegjësinë për të gjuajtur e merr Vllaznim Jashari që nuk gabon nga 11metërshi për ta barazuar rezultatin.

Ende pa e rahatuar mirë, Gjilani shënon edhe njëherë. Një pasim i mirë i Sermaxhajt përfundon te Blakçorri që arrinë ta mposhtë Statovcin për herë të dytë në ndeshje dhe për ti sjellë epërsinë Gjilanit ani pse para dy minutave e pa veten në disavantazh.

Minutat e mbetur të ndeshjes ishin ankth për vendasit megjithse mysafirët nuk krijuan ndonjë mundësi për tu veçuar. Kështu Gjilani arrijnë deri te fitorja e gjashtë këtë edicion që e mbanë atë në pozitën e tretë me 19 pikë të tubuara, ndërkohë për Fushë Kosovën është kjo disfata e katërt me radhë dhe me 13 pikë mban pozitën e tetë në klasifikim.

Për trajnerin e Fushë Kosovës, Astrit Ajeti rezultati nuk ishte aspak real dhe se atë e ndikoi gjyqtari i ndeshjes.

‘’Nëse vazhdojm më këso referimi, futbolli i Kosovës vetëm mprapa do të shkojë. Ne po mundohemin të punojmë për të mirën e sportit, por siç duket këta njerëz po na e humbin edhe mundin. Vendimet kontraverse si dhe akordimi i dy penaltive na demoralizun si ekip. Nuk di çfarë të shtoj tjetër pos të uroj Gjilanin për këtë fitore’’, përfundoi Ajeti.

Gjilani – Fushë Kosova 2:1

Stadiumi i Qytetit në Gjilan
Shikues: 250
Gjyqtarë: Visar Kastrati, Nexhmedin Bala, Nuhi Hysenaj
KV: Emini, Kosumi, Blakçorri, Ibërdemaj – Statovci, Beqiri, Mjeku, Bushi, F.Krasniqi, V.Krasniqi
Shënues: Jashari (pen) 60’, Blakçorri 61’ – Bushi 24’

Gjilani: Maloku, Hyseni, Arifi, Emini, Sermaxhaj, Kosumi, Ramadani (Ibërdemaj), Maliqi, Morina (Xhymshiti), Jashari, Blakçorri (Marovci).
Fushë Kosova: Statovci, Kida, Beqiri, Mjeku, Demaj (Breznica), Pllana, Shabani (Jashanica), Shala, Bushi (Dumoni), F.Krasniqi, V.Krasniqi.

/Drilon SYLEJMANI / 2L ONLINE/