(2L ONLINE) – Janë zhvilluar ndeshjet e xhiros së trembëdhjetë në Ligën “Agim Ramadani”. Nxehtë ishte edhe këtë vikend në Palestrën e Sporteve “Bashkim Selishta – Petriti” në Gjilan, pasi skuadrat po japin gjithçka nga vetja për ti realizuar objektivat për këtë fazë të garave. Për një pozitë që dërgon në play off, në garë janë shumë skuadra, duke bërë kështu edhe më interesante kampionatin.
Verbica ka mposhtur Karadakun në njërën nga ndeshjet më interesante të kësaj jave për të shpresuar edhe më shumë në një vend që i afron drejt play offit. Më afër fazës finale është edhe skuadra e FSK-së e cila edhe këtë javë u tregua shumë e suksesshme duke mposhtur Autoshkollën Arti.
Djemtë e Qytetit janë rikthyer tek fitoret deri sa në këtë vikend kanë mposhtur Dalian që shpejt zbret me këmbë në tokë pas fitores së javës së shkuar.
Lideri The Living Room më vështirë seç pritej ka mposhtur Las Vegasin në derbin e javës. Fitore me rëndësi ka realizuar edhe skuadra Vëllezërit Aliu që ka mposhtur skuadrën e Dobërçanit që po kalonte nëpër një formë fantastike. Një skuadër tjetër që po kalon nëpër një formë të mirë është ajo e MobiCasas e cila e mposhti me rezultat bindës Policinë. Ndërkohë, në ndeshjen e fundit të kësaj jave, Katana mposhti Eurolloton për të vazhduar serinë e fitoreve rradhazi.
/Drilon SYLEJMANI/ 2L ONLINE/
