Durim!

Nga: Arsim Kastrati

Me ia dashtë veç pak t’mirën Kosovës e me i përcjellë zhvillimet politike në të dhe rreth saj, duhet pasur goxha shumë durim.

Në këtë vend, zhvillimi shoqëror dhe ekonomik shkon veç me hapa të breshkës.

Proceset e integrimit BE-ja i ka kushtëzuar me formimin e një entiteti politikoterritorial monoetnik brenda strukturës multietnike të shtetit, të cilin 5 anëtaret mosnjohëse të BE-së ndoshta nuk do ta njohin as pas pranimit të  formimit të entitetit në fjalë.

Ndërsa politikanët kosovar, që nga pas lufta e deri në ditët e sotme asnjëherë nuk janë kujdesur për interesin e përgjithshëm shoqëror, por vetëm për interesat e tyre të veçanta, klanore, familjare e individuale.

S’do mend se ngecja në proceset eurointegruese në masë të konsiderueshme i atribuohet vet skenës politike vendore të cilën e karakterizon, korrupsioni, nepotizmi, mungesa e patriotizmit veprues, jokompetenca dhe apatia e theksuar.

Në ndërkohë, shumicën e popullit e ka molisur dhe reduktuar mungesa e prosperitetit ekonomik të vendit, papunësia dhe çmimet e larta, pagat tejet të ulëta të të punësuarëve, mungesa e sigurimit shëndetësor dhe dobësimi i rolit të sindikatave, mosrealizimi serik i premtimeve politike dhe ikja masive e të rinjëve në Perëndim.

Mbi të gjitha popullin e Kosovës e ka molisur dhe reduktuar pritja, pritja për ditë më të mira, për ditët që nuk vijnë.

Asgjë më shumë se sa pritjet e stërzgjatura nuk e shkaktojnë dëshpërimin dhe zhgënjimin e individëve e të popujve.

Një popull i cili për 25 vjet nuk mund të votojë të tjerë pos një grushti politikanësh, për shkak të pengimit të reformave elektorale nga ana e tyre dhe, një popull të cilit që prej vitit 2000 BE-ja vazhdon ti thotë: “ti plotëso kushte e unë ndoshta të pranoj në gjirin tim”, ndoshta?!

Një populli si këtij tonit i duhet goxha shumë durim, goxha shumë nerva (n’i paçin mbetë), të vazhdoj ta përcjellë se si politikanët e saj luajnë ‘guxha’ me fatin e institucioneve shtetërore dhe se si BE-ja ia ofron ftohtësinë, ironinë dhe kushtëzimin e skajshëm si perspektivë demokratike e integruese.  /2LONLINE/