Dromca “meselesh” nga kuvendarët gjilanas!

/2L ONLINE/ – Kuvendi Komunal i Gjilanit, përkatësisht një pjesë e anëtarëve të Kuvendit me diskutimet e tyre, me ndërhyrjet me, e pa mikrofon, me qasjen e komunikimit që kanë , dinë të bëhen komikë, dinë të bëjnë skena komike e interesante, e që as seanca e sotme, nuk ka kaluar pa pasur të tilla, andaj veçojmë disa momente:

– Gjatë seancës së sotme, anëtari i Kuvendit nga radhët e PDK-së Izmi Zeka, duke dashtë të kërkoi fjalën apo të jap sqarime, jashtë mikrofonit, iu drejtua kryesues së Kuvendit Valentina Bunjaku Rexhepi, duke e thirrur në emër, por, ajo ia ktheu menjëherë duke i thënë “Kryesuese! Për ty jam kryesuese!”.

– Ndërkohë që opozita këmbëngulte që seanca mos të nis pa praninë e kryetarit të komunës , për arsye se në rend dite ishte edhe raporti nëntë mujor i kryetarit, kryesuesja e kuvendit insistonte të procedohej tutje me seancë, duke thënë se kryetari i komunës po që se vjen, inkuadrohet, nëse jo janë nënkryetari dhe drejtorët prezentë, andaj nuk ka nevojë të jetë domosdo kryetari. Në këtë ka reaguar Sahit Abazi (PDK) duke i thënë asaj: “Ju jeni kryesuese e jona nuk jeni zëdhënëse e kryetarit Hazirit”

– Në një moment kur opozita (PDK) insistonte të futej në rend dite çështja e arsimit e pozita e shpërfillte një kërkesë të tillë sa që e bëri PDK-në të “kërcënonte” se mund të ndërmerrte ndonjë veprim të bojkotit apo pengimit, fjalën e kërkoi Bajram Hasani ( kuvendar i pavarur), që vije nga subjekti Nisma për Kosovën, duke i dhënë përkrahje PDK-së, nëse kjo do ta bllokonte Kuvendin. “Keni përkrahjen time të plotë nëse vendosni me e bllokoni kuvendin”, u shpreh ai, duke bërë që kjo të ishte inserti i radhës së “ironisë” i shprehur në Kuvend.

– E me mungesën e kreut të komunës ka ironizuar edhe anëtari i PDK-së Riad Rashiti me propozimin e tij interesant, duke kërkuar që seancat të mbahen prej orës 18:00 apo 20:00, edhe atë në Prishtinë në mënyrë që të ia përshtatnin orarin agjendës së kryetarit Haziri, që të mos mungojë më nëpër seanca, siç ka ndodhur deri më tani.

– Deklarata interesante erdhën edhe nga Bujar Nevzati (PDK), i cili, duke iu referuar mungesave të kryetarit Haziri nëpër seanca, tha se “Gjilani është pa kryetar. Që dy vjet nuk kemi kryetar!”
Po ashtu duke e komentuar sallën e re të Kuvendit ai tha se është e vogël duke e quajtur madje edhe “kotec”.

– Avdyl Aliu, shef i grupit të Këshilltarëve të LDK-së, tani më ka marr nofkën “këshilltari i meseleve” edhe në këtë seancë, duke ironizuar me opozitën që nuk po e vlerësonte sallën e re të kuvendit, e tregoi një mese të re, duke përmendur se si njëri u tregonte miqve shtëpinë e tij dhe kur ata e vlerësuan se si shtëpia ishte e mirë, por vërejtje patën tek kuzhina që ishte e vogël, pronari ua ktheu se, kuzhina e vogël mundësoi që shtëpia të jetë e madhe. Ai me këtë tha se dëshiron të thotë se salla mund të jetë e vogël, por që do të dalin punë të mëdha nga këtu.

– Kritikat e opozitës në adresë të Drejtorit të Arsimit i priti me ironi, Isa Agushi nga LDK-ja, duke e “trimëruar” drejtorin e Arsimit se “ nuk po kanë ku me ta ngjit”, duke aluduar se opozita nuk po ka argumente në akuzat dhe kritikat e saja…

E sihariqe të tilla nga kuvendarët gjilanas pati dhe do të ketë akoma nëse i referohemi asaj se çfarë kemi dëgjuar deri më tani, nëpër seancat e deristanishme. /2L ONLINE/