Drita shënon fitore të rëndësishme ndaj Lubotenit

Klubi i Volejbollit Drita, ka arritur një fitore shumë të rëndësishme dhe të pastër me rezultat 3-0,  ndaj KV Lubotenit, ndeshje kjo e javës së 19-të në Raiffeisen Superliga A – Meshkujt, luajtur në palestrën “Bill Clinton” në Ferizaj.

Luboteni 0-3 Drita
20-25, 19-25, 29-31

Gjilanasit fituan dy setet e para 25-20 dhe 25-19, ndërsa seti i tretë solli dramë të madhe në parket, për t’u mbyllur 31-29, sërish në favor të djelmoshave të Dritës.

Ekipi i Dritës tregoi karakter, përkushtim dhe lojë shumë të mirë nga fillimi deri në fund, duke dominuar ndeshjen dhe duke marrë tri pikë të merituara.

“Kjo fitore e madhe i dedikohet edhe dy lojtarëve tanë që sonte munguan për shkak të lëndimeve, Rinor Hazrrolli dhe Mario Lugaj.  Kontributi i tyre për ekipin është shumë i rëndësishëm dhe shpresojmë t’i kemi sa më shpejt përsëri në parket”, thuhet në njoftimin e klubit pas kësaj fitoreje.

Po ashtu, drejtuesit e klubit e kanë uruar gjithë ekipit për paraqitjen dhe lojtarëve të rinj me vetëm 15 vjet si Mal Devaja, Engjell Dalipi e Kejsan Mavriqi që shkëlqyen me lojën e tyre si dhe të gjithë ata që po e mbështesin klubin si gjithmonë.

Përndryshe, kjo është fitorja e 14-të e sezonit për Dritën, që vazhdon të mbajë vendin e tretë në tabelë dhe njëkohësisht afrohet me Pejën, duke shfrytëzuar humbjen e saj në këtë fundjavë.

Në KV Drita thonë se do të vazhdojë puna dhe përkushtimi për sfidat e radhës.  /2LONLINE/