(2L ONLINE)- Skuadra e Dritës ngecë sërish në një barazim, kësaj radhe në shtëpi ndaj Besës. Një gol nuk vlen më shumë se një pikë nga ky takim që gjilanasit e panë në disavantazh. Mjafton goli i barazimit për ta regjistruar të dytin me radhë, ndërkohë që ‘’aroma’’ e fitores duke e harruar.
Djelmoshat e Agron Selmanit nuk ia kanë dalë më shumë se një barazim para publikut të tyre duke i ndarë golat dhe pikët me Besën. Epilogun e kësaj sfide e sheh real edhe tekniku i bardhekaltërve.
‘’Ne e dhamë maksimumin, duke krijuar shumë raste mirëpo realizuam vetëm një. Ishte e vështirë të kthehesh pas disavantazhin përkundër se ne e arritëm, por barazimi ishte rezultat real’’,tha pas ndeshjes Agron Selmani.
Nuk mjaftojnë vetëm rastet
Pjesëtoja e parë u takoi vendasve fillim e mbarim. I pari që rrezikoi portën e udhëtuesve ishte Blendim Gashi në minutën e 20-të, por, që gjuajtja e sulmuesit brenda zonës shkoi mbi portë.
Tre minuta më pas, tentoi edhe mbrojtësi Taulant Haliti me kokë, por edhe tentimi i tij ishte i kotë.
Rasti i vetëm i pejanëve në pjesën e parë ishte ai i Florent Qorraj, kur gjuajti nga afërsia mbi portën e Huruglices.
Vendasit e mbyllin ashtu si e nisin ndeshjen, duke sulmuar por pa marrë rendimentet e duhura. Një depërtim i Elmedin Muratit ka mundur të përfundojë në portën e Nezirit, sikurse sulmuesi i ri të ishte më i përqendruar para portës. Këtu mbyllet 45 minutëshi i parë me shifra te bardha.
Haliti shpëton Dritën
Për dallim nga fraksioni i parë i lojës, që u takoi vendasve, pjesa e dytë ishte e rezervuar për mysafirët. Menjëherë me tu rikthyer në fushë, futbollistët udhëtues u shfaqën të rrezikshëm, nëpërmjet Fatih Karahodës që me një vole gjuajtje e vë në vështirësi Huruglicën.
Siç duket ‘’gardiani’’ vendas nuk do të kishte shpëtim, pasi në minutën e 71-të, do të kapitullonte. Një dalje e pasigurt e tij u ka kushtuar vendasve të cilët i ndëshkon Kastriot Rexha me një gjuajtje precize me kokë.
Përkundër golit të disavantazhit, vendasit nuk u gjunjëzuan dhe shpejt u rikthyen në lojë. Harkimin e Shqipërim Kelmendit nga këndi, në gol e ka kthyer Taulant Haliti që barazon shifrat.
Minutat e mbetur nuk prodhuan asgjë pos disa gjysmë rasteve dhe kështu dy skuadrat e mbyllën qetë ndeshjen me rezultat të barabartë.
Përkundër se ishin në epërsi, futbollistët e tij nuk arritën ta mbajnë rezultatin. Arsyen siç duket e ka gjetur menjëherë trajneri Arbnor Morina që pas ndeshjes tha:
‘’Kemi luajtur pa gjysmën e ekipës. Rezultatin është dashur ta ruajmë por nuk arritëm pasi në përbërje kemi lojtare te ri. Me rëndësi është të vazhdojmë me rezultate të mira’’.
I pyetur nga Portali ‘2L ONLINE, lidhur me gjendjen nëpër të cilën po kalon ish skuadra e tij Morina u shpreh: ‘’Drita sot tregoi lojë të mire dhe besoj se dita e ditës do ti përmirësoj rezultatet e saj. Unë i uroj suksese në vazhdim të kampionatit’’.
Drita – Besa 1:1
Stadiumi i Qytetit në Gjilan
Shikues: 400
Gjyqtarë: N.Raci, F.Abrashi, M.Berisha, L.Hasani
KV: Mazrekaj, Mulaj (Besa)
Shënues:Haliti 78’ – Rexha 71’
/Drilon SYLEJMANI / 2L ONLINE/
/FotoArkiva/