Drita pret Ferizajn, Gjilani mysafir te Ballkani

Sot zhvillohen tri ndeshje të javës së 28-të të Superligës së Kosovës në futboll.

Dy skuadrat gjilanase që bëjnë gara në elitën e futbollit kosovar, FC Drita e SC Gjilani luajnë kundër Ferizajt, përkatësisht Ballkanit.

Drita, aktualisht kryeson tabelën e klasifikimit me 51 pikë, tri më shumë se Ballkani dhe kjo ndeshje është një mundësi e mirë për ta ruajtur këtë diferencë, apo edhe shtuar, nëse skuadra nga Suhareka lëshon pikë në këtë xhiro, transmeton 2LONLINE.

Kështu, sa po afrohet fundi i kampionatit Drita, kampione aktuale, është në rrugë të mirë për ta mbrojtur këtë titull. Gjithsesi ka ende lojë, por jo edhe vende për gabime e lëshime pikësh.

Në këtë vazhdë edhe kryetetrajneri i Dritës, Zekirija Ramadani, theksoi ditë më parë se, tri pikët do të mbesin te skuadra gjilanase, nga ballafaqimi me Ferizajn, ndeshje kjo që luhet sot e që fillon në ora 15:00.

Skuadra tjetër gjilanase, SC Gjilani, synim ka daljen në Evropë dhe është në rrugë të mirë për ta arritur këtë. Aktualisht Gjilani është në pozitën e katërt me 42 pikë, por aq ka edhe Prishtina e treta. Ndeshja e sotme e skuadrës “kuq e bardh”, vlerësohet e vështirë pasi përball ka një  skuadër si Ballkani, që synon titullin e kampionit, transmeton 2LONLINE.

Gjithsesi, një fitore e mundshme e gjilanasve do të ishte tejet e rëndësishme në rrugëtimin e mëtutjeshme të Gjilanit drejt objektivit që ka.

Ditë më parë, kryetrajneri i SC Gjilanit, Debatik Curri, në një konferencë me gazetarë, ka thënë se do të luftojnë për fitore.

Edhe ndeshja Ballkani – Gjilani, luhet sot dhe fillon në ora 15:00.

Ndeshje tjetër në orar për sot, është ajo mes Llapit e Drenicës, derisa nesër do të luhet ndeshja e fundit e kësaj xhiroje, në mes të Prishtinës e Dukagjinit.   /2LONLINE/