Drita nuk e mbajti dot rezultatin deri në fund, i duhej të kënaqej me një barazim

Ka përfunduar me barazim ballafaqimi Prishtina – Drita, ndeshje kjo e javës së katërt të Albi Mall Superligës së Kosovës në futboll, e luajtur në stadiumin “Fadil Vokrri” në kryeqytet.

Një 45-minutësh i parë i mirë i Dritës ka bërë që në pushim mes pjesëlojëve, skuadra gjilanase të shkojë me epërsinë prej 2 me 0.  

Golat për skuadrën bardhë e kaltër i shënuan Egzon Bejtullai e Vesel Limaj.

Por, pjesëloja e dytë, u takoi vendësve të cilët reaguan siç është më së mirë për ta dhe përmes zëvendësuesve, që dolën të ishin të qëlluara, barazuan rezultatin në 2:2, dhe ky rezultat doli të jetë edhe epilogu i këtij takimi, që deri në fishkëllimin e fundit të gjyqtarit kryesor, solli emocione të shumta.

Golat për Prishtinën i shënuan Ardian Muja e Alban Shillova.

Kështu, nga tri lojë që i ka luajtur FC Drita në këto katër xhiro, sepse me Drenicën ndeshja është shtyrë për shkak të angazhimit të skuadrës gjilanase në Europë, skuadra bardhë e kaltër, nuk ka ende fitore, por me dy barazime e një humbje ka vetëm 2 pikë dhe renditet të pozitën e parafundit.  /2LONLINE/