Drita mposhti Pejën, liderin e tabelës
Klubi i Volejbollit, KV Drita ka shënuar fitore ndaj KV Peja, lidere e tabelës, në takimin e radhës, të javës së 15-të, në Raiffeisen Superligën A (Meshkujt), të Kosovës në Volejboll të luajtur në Palestrën e Sporteve në Kamenicë.
Drejtuesit e klubit “bardh e kaltër” nga Gjilani e vlerësojnë këtë si një fitore të madhe ndaj liderit, ku lojtarët e klubit gjilanas treguan zemër, forcë dhe karakter”, transmeton 2LONLINE.com
“Fitore e jashtëzakonshme 3-2 në sete (22/25, 25/23, 23/25, 25/21 dhe 15/13) ndaj liderit aktual KV Peja, në një ndeshje dramatike deri në pikën e fundit. Edhe kur ishim në disavantazh, nuk u dorëzuam. Luftuam për çdo top, për çdo set, dhe në fund e merituam këtë fitore të madhe. Kjo është dëshmi se me punë, besim dhe unitet mund të mposhtet çdo kundërshtar”, thuhet në njoftimin e këtij klubi.
Drejtuesit e KV Drita kanë falënderuar lojtarët për shpirtin luftarak dhe tifozët për mbështetjen e jashtëzakonshme!
Përndryshe, fitore shënuan edhe me skuadrën e Juniorëve duke mposhtur Pejën me rezultat 2-0 në sete dhe Drita këtu është lidere në renditjen tabelare.
“Vazhdojmë të bashkuar, hap pas hapi drejt objektivave tona”, thuhet në fund të njoftimit të KV Drita. /2LONLINE/