Drita më e mirë se Dukagjini, Gjilani pëson nga Llapi

Kanë përfunduar ndeshjet e xhiros së shtatë në Superligën e Kosovës në futboll, e dy skuadrat gjilanase që bëjnë gara në elitën e futbollit kosovar, FC Drita ka shënuar fitore, e SC Gjilani ka pësuar humbje.

FC Drita, ka shënuar fitore të rëndësishme për të dalë nga “kurtha”  e krizës së rezultateve, në këtë fillimstinor.

Skuadra bardh e kaltër që drejtohet nga Zekirija Ramadani ka gjetur edhe fitorën e dytë në këto shtatë javë, pasi mundi në shtëpi, Dukagjinin me rezultatin 3-1.

Mysafirët shënuan të parë përmes Dienit Isufi, por reaguan futbollistët e skuadrës bardh e kaltër me golat e Liridon Balaj, Arb Manaj dhe Salifu Ibrahim, për ta vulosur fitoren e dytë, që i sjell tri pikë të reja për skuadrën gjilanase.

Me këtë fitore, Drita tani ndodhet në pozitën e pestë të tabelës së klasifikimit, me tetë pikë të grumbulluara.

Ndërkohë, skuadra tjetër gjilanase, SC Gjilani ka pësuar humbje, nga Llapi, e cila ka triumfuar bindshëm me një fitore me rezultat 4-1. Për llapjanët shënuan Gnabi (dy herë), Peci e Ramadani, e për gjilanasit, Aganspahic.

Kështu, llapjanët “e gjetën” skuadrën e Gjilanit, për ta regjisturar fitoren e parë të tyre, në këto xhiro të deritanishme, e Gjilani regjistroi edhe një humbje, tani më të thellën.

Skuadra që drejtohet nga Ardian Nuhiu, tani ka 7 pikë nga këto 7 javë dhe i duhet të gjej edhe lojën e mbi të gjitha rezultatin, nëse do të arrijë aty ku e ka qëllimin që e ka shpalosur sepse kështu si ka ecur deri më tani, kjo nuk do të jetë e mundur, gjithsesi ka mjaftë xhiro për t’u luajtur.

Përndryshe, në takimet tjera u arritën këto rezultate: Prishtina e Re – Ballkani 0:3, Drenica – Malisheva 3:4 dhe Ferizaj – Prishtina 0:5.   /2LONLINE/