Drita fiton në minutat shtesë, për fund të lumtur kujdeset Xhevdet Shabani

Dueli i javës së 24 i Ipko Superligës së Kosovës në futboll, mes Ferizajit dhe Dritës përfundoi me rezultat 1:2. Minutat shtesë të takimit ishin vendimtare.

Derisa pjesa e parë përfundoi në të mirë të vendasve, falë golit të Qëndrim Dautaj në minutën e 26’, loja ishte plot raste të tjera në fushë.

Kampioni në fuqi Drita tregohej herë pas here e rrezikshme dhe kërkonte golin, por portiere vendas Armend Blakqori ishte gjithmonë në vend. Ai mohoi golin e Endrit Krasniqit, Haxhi Nezirajt e Kyrian Nwabueze.

Mirëpo, pjesa e dytë solli ndryshime të menjëhershme nga mysafirët. Kjo pasi, Nwabueze i Dritës në minutën e 54’ të takimit gjuan me saktësi drejt portës dhe realizon për 1-1.

E gjithë pjesa e dytë u karakterizua nga mundësi të një pas njëshme dhe mysafirët e Dritës nuk e ndalnin presionin në kërkim të golit. Rastet i shpërdoruan Bujar Shaban, Xhevdet Shabani e Nwabueze.

Por, goli i fitores për Dritën erdhi në minutat shtesë të takimit, 90+ dhe për këtë u kujdes Xhevdet Shabani me një goditje nga largësia.

Drita forcon pozitën e 4 me 41 pikë, ndërsa Ferizajit me këtë humbje i vështirësohen punët për mbijetesë.