Drita nuk e gjeti dot formulën kundër Llapit, për t’i ndalë të tri pikët në Gjilan, por u deshtë që të mjaftohet vetëm me një pikë, pasi epilogu i këtij takimi, i javës së dytë të Superligës në futboll, ishte ndarja në paqe, për më tepër edhe rezultati ishte i bardhë, pasi portat nuk u prekën.
Në fakt, rrjeta e Dritës u tund njëherë, por se sistemi i VAR-it, i cili nga fillimi i këtij kampionati po përdoret edhe në Kosovë, bëri që goli të anulohet për shkak të një faulli paraprak në sulm dhe me këtë edhe vendësit t’ia shohin hairin këtij sistemi.
Përndryshe, VAR-i edhe njëherë para këtij goli të anuluar kishte hyri në punë, kur lojtari i Llapit u ndëshkua me të kuq, (portieri Marjan Çoriq), e i cili ndëshkim mund t’i jepte drejtim tjetër lojës, por që u korrigjuar nga ky sistem, duke bërë që në këtë rast edhe skuadra e Llapit, të kishte hair nga VAR-i.
Skuadra nënkampione, Drita tentoi në disa raste të vinte deri te goli i dëshiruar, e po ashtu raste te saja i pati edhe fituesi i Kupës dhe i Superkupës, Llapi, por që asnjëra palë nuk e zhbllokuan dot rezultatin.
Sidoqoftë, ajo pjesë e publikut e pranishme në stadium, panë një pjesë të parë më të qetë dhe një lojë me më shumë rivalitet e tensione në pjesëlojen e dytë. Vlen të theksohet se reagimet e trajnerit mysafirë Tahir Batatina, bënë që ai të ndëshkohet me karton të kuq, e me një të tillë u ndëshkua edhe një lojtar i Llapit (Bujar Idrizi), në minutat shtesë, që ishin plotë 13-të të tilla, por që bashkë edhe me 90 minutat e rregullta nuk ndryshuan asgjë në epilog, pasi fërshëllima e fundit e gjyqtarit, e zyrtarizoi përfundimin e ndeshjes pa gola, takim ky i vlerësuar si derbi i kësaj jave.
Momentalisht, skuadra bardhë e kaltër pas dy ndeshjeve të para ka 4 pikë, kurse Llapi mbetet me 2 pikë, e në takimet e radhës, Drita luan si mysafire me skuadrën Malisheva, e Llapi pret në terren të vetin Feronikelin. /2LONLINE.com/
KOMENTE