Drita “demolon” Gjilanin

Dritës iu nevojiten vetëm 45 minutat e pjesëlojës së parë, për ta regjistruar me fitore kryederbin, takimin e javës së 26-të, të Superligës së Kosovës në Futboll, ndaj rivalit lokal, Gjilanit. Epilogu i këtij takimi ishte 4:0, dhe që të gjitha golat bardhekaltërtit, që e dominuan plotësisht takimin, i shënuan në 45 minutat e para.

Gjilani u tregua i pafuqishëm, për t’i bërë ballë Dritës superiore, liderit të tabelës së klasifikimit, e cila me këtë fitore, po rrugëton e vetme, e me hapa të sigurt drejt kurorëzimit me titullin kampion. Ndërkohë, Gjilani, që nisi mirë stinorin pranveror, duhet ndërmarrë sa më parë masa, për ta ndalur teposhtëzën, nëse do me i mbajtë shpresat gjallë, për dalje në Evropë.

Përndryshe, kur jemi te ndeshja e sotme, ishte Almir Ajzeraj, që hapi serinë e golave për të pasuar me golin e kapitenit Rron Broja, pastaj edhe Arb Manaj gjeti rrjetën kundërshtare, e cila  rrjetë u tund edhe nga ukrainasi i Dritës, Denys Kostyshyn, për t’u vulosur fati i ndeshjes që në pjesëlojën e parë

Në pjesëlojën e dytë nuk pati gola, Drita, e kënaqur nga ajo që arriti në pjesën e parë, i lëshoi ca terren kundërshtarit, Gjilanit, i cili i bëri nderrimet e shumta, por pa prodhuar efekt kur jemi te golat, kështu që përveç rasteve, rezultati mbeti po ai i pjesës së parë, deri në fund të takimit.

Me këtë fitore Drita, shkon në kuotën e 57 pikëve, lidere e tabelës, që ndiqet pas nga Ballkani me 43 pikë (një lojë më pak).  Ndërkohë që Gjilani aktualisht është në pozitën e 4-të me 35 pikë, por vendi, i 5, 6, e 7, Prishtina, Ferizaj, Dukagjini, që kanë nga 32 pikë, kanë edhe nga një lojë më pak të zhvilluar, kështu qv radhitja mund të ndryshojë. /2LONLINE/