Drejtoria për Mbrojtje dhe Shpëtim apelon për kujdes nga zjarret, Shabani: “Raportoni menjëherë çdo rast të dyshimtë”

Drejtoria për Mbrojtje dhe Shpëtim në Gjilan u ka bërë apel qytetarëve që të tregojnë kujdes të shtuar dhe të respektojnë masat e sigurisë, veçanërisht gjatë periudhave kur rreziku nga zjarret është më i lartë.

Drejtori i Drejtorisë për Mbrojtje dhe Shpëtim, Enver Shabani, së bashku me pjesëtarët e Njësisë së Zjarrfikësve dhe Shpëtimit në Gjilan, ka qenë i pranishëm gjatë një intervenimi në terren, ku ekipet emergjente kanë vepruar për menaxhimin e situatës dhe mbrojtjen e qytetarëve dhe pronës, transmeton Portali  2LONLINE.com.

Shabani ka vlerësuar angazhimin dhe gatishmërinë e vazhdueshme të zjarrfikësve për të reaguar në situata emergjente, duke theksuar njëkohësisht rëndësinë e bashkëpunimit dhe kujdesit të qytetarëve.

“Apelojmë te të gjithë qytetarët që të tregojnë kujdes të shtuar dhe të respektojnë masat e sigurisë. Çdo situatë e dyshimtë apo rast zjarri duhet të raportohet menjëherë te shërbimet emergjente, në mënyrë që reagimi të jetë sa më i shpejtë dhe efektiv”, ka deklaruar Shabani, transmeton 2LONLINE.

Drejtoria për Mbrojtje dhe Shpëtim ka falënderuar zjarrfikësit për profesionalizmin, përkushtimin dhe gatishmërinë e tyre të vazhdueshme për intervenim.

Nga kjo drejtori është theksuar se mbetet e përkushtuar në reagimin e shpejtë ndaj situatave emergjente, parandalimin e rreziqeve dhe mbrojtjen e jetës dhe pronës së qytetarëve.  /2LONLINE/