Drejtoria e Zhvillimit Ekonomik dhe Dogana e Kosovës, takim me bizneset

(2L ONLINE) – Drejtori i Zhvillimit Ekonomik, Ismail Januzi, është takuar sot me drejtorin e Doganës së Kosovës për Regjionin e Gjilanit, Bedri Abdyli, ku kanë konfirmuar takimin me komunitetin e biznesit në Gjilan, për t’i promovuar lehtësirat doganore në mënyrë që të krijohen njohuri të sakta që do të ndihmojnë në funksionin e drejtpërdrejtë të doganës me bizneset dhe anasjelltas.

Me këtë rast drejtori Januzi ka thënë se me përgjegjësit e doganës së Kosovës për regjionin e Gjilanit kemi biseduar bashkërisht për organizimin e një takimi me komunitetin e Biznesit, Drejtorinë e Zhvillimit Ekonomik dhe Doganën.

“Kemi marrë konfirmimin e doganës që në fund të këtij muaji, do ta kemi një takim të përbashkët me komunitetin e biznesit, ku do të bisedojmë me ta për problemet që ata kanë, informimin për lehtësirat doganore në sektorin ekonomik dhe procedurat tjera”, ka thënë ai duke shtuar se komuniteti i biznesit do të informohet me kohë për takimin i cili do të mbahet në sallën e Kuvendit të Komunës në fund të këtij muaji. /2L ONLINE/